Previous Next

Conselho de Imprensa Estabelese Kooperasaun ho PNTL no CNC

Díli – Conselho de Imprensa de Timor-Leste (CI), estabelese kooperasaun ho Polisia Nasionál Timor-Leste (PNTL) no Centro Nacional Chega (CNC) liuhosi asina Nota Entendimentu (MoU-sigla ingles), iha Delta Nova, 20 Dezembru 2019.
Nota entendimentu ne’e, asina iha ámbitu atriuisaun kartaun karteira profesionál no natal hamutuk ho jornalista no parseiru sira Conselho de Imprensa nian, iha loron 20/12/2019, iha Delta Nova.

Haktuir nota kooperasaun entre CI ho PNTL, nu’udar nesesidade atu artikula asaun balun hamutuk entre CI ho PNTL hodi promove koñesimentu di’ak liutan entre entidade rua ne’e, kona-ba responsabilidade husi jornalista no membru PNTL sira.

Objetivu hosi kooperasaun CI no PNTL maka hanesan, primeiru, hametin no promove respeitu malu entre jornalista ho Polísia hanesan hanesan ajente autoridade sira, ho sentidu atu evita konflitu ne’ebé bele rezulta husi dezenvolvimentu atividade professional, no serbisu hamutuk tuir objetivu ba interese komum.

Segundu, garantia ba asesu informasaun ba parte jornalista, ho sentidu promove Liberdade espresaun no Liberdade imprensa, terseiru, defende legalidade demokrátika, garante seguransa bae ma sira no riku soin inklui salvaguarda ba sidadaun sira nia direitu, kuartu, buka forma ba dezenvolve atividade konjunta no promove objetivu husi instituisaun rua (2) tuir interese kooperasaun nian.

Iha intervensaun, Prezidente CI, Virgílio da Silva Guterres hatete koopesaun ne’e bele ajuda jornalista sira no Polísia tanba dalabarak liu hasoru malu iha terenu durante hala’o atividade professional. 

“Nota kooperasaun ida ne’e bele hametin entendimentu hosi parte rua (PNTL ho Jornalista), atu idak-idak hatene nia papél nomós rekoñese ida seluk nia papél iha sosiedade,” esplika Prezidente CI, Virgílio da Silva Guterres katak nota kooperasaun ne’e, bele rezus mós dezentendimentu parte rua bainhira hala’o serbisu iha terenu.

Entretantu, reprezentante Kamandante Jeral PNTL, Superintendente Xefe, José Soares kongratula Conselho de Imprensa tanba bele serbisu hamutuk iha tempu barak hodi prepara nota entendimentu ne’ebé ofisiliza iha loron 20 Dezembru 2019.
Superintendente Xefe, José Soares hatete PNTL no CI estabelese nota entendimentu ida ne’e, hodi hatudu ba públiku katak instituisaun rua refere iha duni interese boot atu serbisu hamutuk hodi serbi povu.

“Mídia nia papél hanesan ponte ida atu liga, hanesan janela ida atu loke informasaun sira sai ba mundu. Komandu Jerál sente kontente no orgullu atu ita bele reforsa tan ita nia kooperasaun hodi fasilita ita nia membru sira bele rekolla informasaun iha fatin ne’ebé de’it,” Superintendente Xefe José Soares .

“Ita hamutukmak ita fote atu bele garante estabilidade no asegura estadu ida ne’e tuir saída maka konsagra ona iha konstituisaun RDTL. Hamutuk it abele no hamutuk ita serbi rai Timor ho di’ak liutan,” akresenta Superintendente Xefe, José Soares.

Iha fatin hanesan, Diretór Ezekutivu CNC, Hugo Maria Fernandes hatete CNC sempre tau importánsia kona-ba memória, tanba ne’e estabelese ona kooperaun barak ho parseiru estratéjiku sira.

“Relatóriu Chega rekoñese esforsu boot ne’ebé jornalista sira (estranjeiru no timoroan) halo durante tinan 24 para depois atu inform aba iha mundu kona-ba saída maka akontese,” esplika Hugo Maria Fernandes.

Relatóriu Chega mós rekoñese kona-ba esforsu boot jornalista sira ne’ebé susar tebes atu rekonlla informasaun nune’e bele publika ba mundu. (CI)

Anexu


Imprimir   Email