Atividade

CI Promove SEAPC-Net ba PPI no CCPC

Cebu, Filipina – Conselho de Imprensa de Timor-Leste (CI), promove  Southeast Asia Press Council Network (SEAPC-Net), ba Philippine Press Institute (PPI) no Cebu Citizens Press Council (CCPC).

CI promove SEAPC-Net liuhosi vizita serbisu Conselho de Imprensa nian ba Filipina (Manila no Cebu), durante semana ida, hahú hosi loron 7-14 /12 / 2019, kompostu hosi Konselleiru, José Maria Ximenes (Xefe delegasaun), Konselleiru, Paulo Adriano da Cruz Araújo, Asesór Rigoberto Monteiro, Ofisiál Mídia, Efrem Duarte Guterres.

Iha vizita, Conselho de Imprensa hato’o pedidu ba PPI no CCPC atu hola parte hodi sai membru ba organizasaun Southeast Asia Press Council Network (SEAPC-Net), ne’ebé foin ofisializa iha loron 4 Dezembru 2019, iha Bali, kompostu hosi organizasaun hat hanesan Conselho de Imprensa de Timor-Leste (CITL), Dewan Pers Indonesia (DPI), Myanmar Press Council (MPC) no National Press Council of Thailand.

Xefe delegasaun, Konselleiru, José Maria Ximenes dehan objetivu Conselho de Imprensa nia vizita traballu iha Filipina maka oinsa atu bele konvida PPI no CCPC hodi hola parte iha rede Conselho de Imprensa.

“Ami mai vizita PPI no CCPC ho objetivu kovida sira atu tama iha Networking ida ne’e,” esplika Xefe delegasaun, Konselleiru, José Maria Ximenes, bainhira remata enkontru ho ekipa CCPC no PPI.

Maske CI konvida ona PPI no CCPC atu hola parte iha SEAPC-Net, maibé membru SEAPC-Net maka sei deside ho dalan konsensu.

Southeast Asia Press Council Network (SEAPC-Net) nia papél prinsipal maka oinsá bele promove Liberdade Imprensa no Liberdade Espresaun iha reziaun Sudeste Aziátiku, inklui halo advokasia no kapasitasaun  ba mídia ho jornalista sira. 

Durante estadia iha Filipina, ekipa CI halo mós vizita ba instiuisaun mídia hanesan jornal The Philippine Star no Jornal Cebu Daily News. Vizita mós fatin istóriku sira hanesan muzeum Casa Gorordo no Museo Sugbo, Media Gallery, inklui Estudante Departamentu Social Communication, university of San José Recoletos. (CI)