Previous Next

Prezidente CI Hetan Atribuisaun Prémiu Direitu Umanu

Dili, Iha komemorasaun loron internasionál Direitu Umanu tinan ne’e, Prezidente Conselho de Imprensa de Timor-Leste (CI), Virgílio da Silva Guterres, sai nu’udar manán nain ba Prémiu Direitu Umanu, Sergio Viera de Melo, ba kategoria Direitu Sivíl no Polítiku.

Prezidente Conselho de Imprensa de Timor-Leste (CI), Virgílio da Silva Guterres, hetan Atribuisaun Prémiu Direitu Umanu, Sergio Viera de Melo, hosi Prezidente da Repúblika, Francisco Guterres Lú Olo, iha Pallasu Prezidente, Ai-tarak Laran, Tersa-feira, 10/12/2019.

Iha diskursu, Prezidente da Repúblika informa katak, “prémiu ne’e fahe ba kategoria rua, kategoria direitu sivíl no polítiku, ne’ebé konsidera ema ka istituisaun ka organizasaun ne’ebé promove, defende no divulga direitu umanu ne’ebé koñese iha mundu tomak iha ámbitu direitu sivíl no direitu polítiku nian no direitu ekonómiku, sosiais no kulturais ne’ebé konsidera ema ka instituisaun ka organizasaun ne’ebé hala’o atividade hodi promove, defende no divulga direitu umanu iha area direitu ekonómiku no direitu kultura liuliu kombate kiak, dezenvolve seitór edukasaun, saúde, protesaun meiu ambiente no solidariedade sosiál. ” Prezidente da Republika hatutan , “Sr. Virgílio da Silva Guterres Lamukan, durante tinan barak kontribui ba hamosu sosiedade ida ne’ebé respeitu ba direitu umanu liuliu direitu iha area jornalizmu, ho korazen sidadaun ida ne’e defende direitu sidadaun la’ós de’it ba jornalista sira maibé mós ba ema hotu-hotu. Sr. Virgílio da Silva Guterres Lamukan, luta nafatin ba imprensa ida ne’ebé livre iha ita nia rai no defende mós direitu sidadaun sira ba iha informasaun. Virgilio Lamukan komprende knar importante ne’ebé komunikasaun sosiál ida ne’ebé livre no independente iha sosiedade demokrátika ida.” Atribuisaun Prémiu Direitu Umanu Sergio Viera de Melo hahú realiza iha tinan 2008 no tinan ne’e nu’udar atribuisaun ba dala 12.

No husi kandidatu nain 85, kandidatu ba kategoria direitu sivíl no polítiku hamutuk nain 16, kandidatu ba kategoria direitu ekonomia, sosiais no kulturais hamutuk nain 69, liu husi prosesu selesaun too ikus hetan manán nain, nain lima, indivíduu haat no organizasaun noun governmental ida. Iha kategoria direitu ekonomia, sosiais no kulturais, manán nain sira maka Jose Amaral Guterres (Profesór), Marselina dos Santos da Cruz (Profesora) no Organizasaun Konservasaun Flora no Fauna.

Iha kategoria direitu sivíl no polítiku, manán nain sira maka Jose Luis de Oliveira (Diretór Asia Justice and Right) no Virgílio da Silva Guterres Lamukan (Prezidente CI). Partisipa iha Atribuisaun Prémiu Direitu Umanu Sergio Viera de Melo maka Prezidente Tribunal Rekursu, Eis Primeiru Ministru, Mari Alkatiri, Deputadus, Membru Governu, Reprezentante Korpu Diplomátiku, Reprezentante Relijioza, Sosiedade Sivíl, Premiadu Sira no Família.


Imprimir   Email