Previous Next

Enkontru Ikus CI Iha Tinan 2019 Ho Jornalista, Xefe Redasaun, Mídia Nain no Asosiasaun Jornalista, Deside Loron 16 Outubru Nu’udar Loron Nasionál Liberdade Imprensa

Dili, Iha enkontru ikus Conselho de Imprensa de Timor-Leste (CI) iha periodu tinan 2019 Ho Jornalista, Xefe Redasaun, Mídia Nain no Asosiasaun Jornalista, ne’ebé realiza iha Salaun Konferénsia Hotel Villa Verde, 29/11/2019, maioria deside loron (16/10) nu’udar Loron Nasional Liberdade Imprensa.

Iha sorumutu ne’e, Prezidente CI, Virgílio da Silva Guterres, esplika esforsu sira ne’e hotu atu redús preokupasaun sira ne’ebé durante ne’e iha. “Uluk iha enkontru ida primeiru, Conselho de Imprensa promete atu hamosu termu referénsia ida kona-ba loron ne’e, bazeia ba enkontru ne’ebé ita halo ho jornalista sira, Xefe redasaun sira nomós titulares sira hanesan Dr. Jose Ramos Horta, tanba ne’e iha enkontru ohin ne’e mós Conselho de Imprensa la’ós lori buat foun mai, tanba iha enkontru rua ho asosiasaun sira, conselho de Imprensa mós rona hosi Asosiasaun sira katak kona-ba loron ida ne’e asosiasaun sira mós uluk halo ona proposta hodi propoin ba órgaun Estadu ida, atu fó aprovasaun ba 16 de Outubru sai hanesan loron nasionál imprensa nian,” dehan Prezidente CI.

Tuir Prezidente CI katak, CI haforsa liután proposta ne’ebé Asosiasaun Jornalista sira propoin ona ba Governu molok CI iha, “tanba momentu ne’ebá Conselho de Imprensa seidauk iha, no agora iha ona, Conselho de Imprensa bele sai lian atu fó hanoin ou fó rekomendasaun atu bele forte liu tan bazeia ba proposta sira ne’ebé ke asosiasaun sira hatama tiha ona, nomós bazeia ba diskusaun sira ne’ebé halo ona inklui diskusaun ida ohin ne’e.”

Prezidente haktuir, Conselho de imprensa sei aprezenta ba Parlamentu Nasionál e rekomenda ba Estadu atu aprova loron Nasionál Liberdade Imprensa, atu sai hanesan rekomendasaun halo parte hosi rekomendasaun sira seluk hosi Conselho de Imprensa ba Parlamentu Nasionál e mós bele fó hateten ba Governu liu hosi Ministériu ne’ebé ke tutela liuliu SECOMS. “Ne’ebé ha’u hanoin enkontru ohin, bele hamosu akta ida hodi konkorda ho esbosu sira ne’ebé la’o ona e pontu ida seluk maka sei rekomenda atu iha nesesidade atu loron Nasionál Liberdade Imprensa, e mós Conselho de Imprensa fó apoiu ho proposta sira ne’ebé ke Asosiasaun jornalista sira hatama tiha ona iha tinan hirak liu ba,” esplika Prezidente CI.

Tuir nia, di’ak liu tan kópia proposta sira ne’ebé Asosiasaun Jornalista sira sei rai hela, bele tau hamutuk fali iha rekomendasaun foun ne’ebé ke atu hakerek ba órgaun Governu nian ou rekomenda ba Parlamentu Nasionál nian. “Tanba ne’e, enkontru ohin ne’e la presiza asina deklarasaun ruma maibé proposta tan de’it atu reintera fali loron ida ne’ebé uluk Asosiasaun sira rekomenda ba ne’e,” Prezidente CI husu.

Enkontru ne’e nu’udar enkontru ikus ba enkontru sira seluk ne’ebé durante ne’e Conselho de Imprensa organiza hodi halo terminasaun ba loron Nasionál Liberdade imprensa.



Imprimir   Email