Bali, Indonézia – Prezidente Conselho de Imprensa de Timor-Leste, Virgílio da Silva Guterres, Membru CI, Konselleiru, Paulo Araujo, Konselleiru, Francisco Belo no Asesór programa CI, Rigoberto Monteiro, partisipa iha primeiru asembleia jerál Southeast Asia Press Council Network (SEAPC-Net) ou Rede Conselho de Imprensa Sudeste Aziátiku, iha Salaun Enkontru Hotel Santika, Nusa Dua, Bali, Indonézia, 4/12/2019.
Iha primeiru asembleia ne’e membru fundadór sira aprova no adopta Estatutu SEAPC-NET no mós hili board of Directors ba períodu 2019-2021. Ba períodu ne’e, Mohamad Nuh, atuál Ketua Dewan Pers Indonesia, eleitu nu’udar Primeiru Prezidente Southeast Asia Press Council Network no Prezidente Konsellu Imprensa Myanmar, Ohn Kyaing nu’udar Vise, Sekretáriu maka Asep Setiawan, atuál Membru Konsellu Imprensa Indonézia.
Hili mós Diretór Board nain haat maka Prezidente CI, Virgílio da Silva Guterres, Prezidente Konsellu Imprensa Tailándia, Chavarong Limpattamapannee, Membru Konsellu Imprensa Indonézia, Agus Sudibyo no Membru Konsellu Imprensa Myanmar, Kyaw Swa Min.
Partisipa iha primeiru asembleia jerál Southeast Asia Press Council Network (SEAPC-Net) maka Conselho de Imprensa de Timor Leste, Konsellu Imprensa Tailándia, Konsellu Imprensa Indonézia no Konsellu Imprensa Myanmar.