Previous Next

CI Konsidera Formasaun “Mudansa Klimátika” Importante ba Jornalista

Díli, Prezidente Conselho de Imprensa de Timor-Leste (CI), Virgílio da Silva Guterres, hatete, formasaun kona-ba “Mudansa Klimátika” importante tebes ba jornalista sira hodi fasilita kobertura no produz notísia.

Prezidente CI, Virgílio da Silva Guterres, hato’o kestaun ne’e iha nia diskursu abertura formasaun “Mudansa Klimátika” ba jornalista sira, iha salaun Asosiasaun Hak, Faról, kuarta-feira (13/11/2019), ne’ebé organiza hosi Asosiasaun Jornalista Timor-Leste (AJTL) no hetan apoiu finanseiru hosi UNESCO.

“Formasaun ne’ebé AJTL ho UNESCO halo ne’e, ba Conselho de Imprensa importante tebetebes atu kontribui ba hasa’e kapasidade jornalista sira nian,” prezidente CI dehan mudansa klimátika ne’e afeta tebes ba ema barak tanba nia efeitu ba seitór hotu-hotu hanesan agrikultura, saúde no seluseluk tan.

Prezidente CI argumenta katak importante tebetebes atu jornalista sira, órgaun no meiu komunikasaun sosiál, iha koñesimentu ho di’ak kona-ba saida maka mudansa klimátika ne’e rasik.

Prezidente Conselho de Imprensa relata katak durante ne’e, órgaun no meiu komunikasaun sosiál sira fó atensaun kobertura boot liu ba seitór polítiku kompara ho seitór meiu ambiente nian mínimu tebes.

Formasaun ne’e hetan partisipasaun maximu hosi jornalista sira hosi órgaun no meiu komunikasaun sosiál sira hamutuk ema na’in 25, no formasaun realiza durante loron haat (4), hahú hosi 13-16 Novembru 2019. (CI)


Imprimir   Email