CI Partisipa I° Kongresu Internasionál ba Radios Lusofonas

Atividade Hare nain: 708

Angra do Heroismo, Açores, 1/11/2019 - Prezidente Conselho de Imprensa de Timor-Leste (CI) Virgílio da Silva Guterres, hamutuk ho Asesór Mídia, Pedro Brinca, Partisipa Kongresu Internasionál ba Dahuluk (I) Radio Luzófona.

Kongresu ne’e organiza hosi Klibur Radio sira ho Inspirasaun Kristaun (ARIC-sigla portugés) durante Loron tolu, hahú hosi 1 to’o 3 Novembru 2019. Kongresu ne’ebé partisipa hosi responsavel radio Nasaun Lozofonas, hala’o iha edifísiu Centro Cultura e de Congressos de Angra do Heroismo, Ilha Terceira, Açores.

Eventu internasionál luzofona ba dahuluk ne’e, loke hosi autoridade governu Rejionál Açores, akompaña hosi Bispu Diocese Angra do Heroismo, D. João Lavrador no Prezidente ARIC.
Conselho de imprensa partisipa kongresu dahuluk nian ne’e hafoin simu Konvite official hosi Klibur Radio sira ho Inspirasaun Kristaun (ARIC-sigla portugés) iha Angra do Heroismo, Ilha Terceira, Açores.

Prezidente Conselho de Imprensa de Timor-Leste (CI) Virgílio da Silva Guterres, esplika asuntu ne’ebé ko’alia iha loron rua nia laran mak aprezentasaun kona-ba Rádiu Visual, ne’ebé dala ruma ema kuandu hare dehan la’ós rádiu maibé ne’e televizaun, tanba rádiu ne’ebé ke kombina visual katak ema ne’ebé hato’o informasaun iha studio rádiu nian mós ema bele hare iha kanál TV.

Prezidente hatutan, oradór sira mós aprezenta software sira ne’ebé ke ema adapta hodi halo funsionamentu rádiu ne’e lais liu ba ema hotu-hotu. “ Iha diskusaun ida ne’e mós sira hotu hateten katak maski iha teknolojia foun sira ne’ebé mosu maibé sira nia hakarak esénsia hosi rádiu ne’e hanesan meius sira ne’ebé ke ema nia lian ne’ebé sai ne’e hanesan “Do” ne’e hakarak kontinua mantein”, Prezidente haktuir.

Tanba ne’e mesmu ho teknolojia foun ne’ebé mai sira lakohi atu rádiu nee sai hanesan televizaun ne’ebé uluk ema barak nia previzaun dehan rádiu sei mate. “ Iha loron tolu ne’e nia laran iha oradór balun mós iha nia intervensaun hateten, planu i Dezenvolvimentu ba rádiu sira i saida mak ita atu hato’o ba ita nia komunidade sira liu hosi programa rádiu ne’e, no mós rekursu sira,” nia realsa.

Prezidente dehan, buat ne’ebé loron tolu sira debate maka idealizmu atu halo rádiu ne’e kontinua, mós realidade atu dehan realista uitoan atu hetan rendimentu hosi publisidade ka komersial hosi merkadoria atu buat rua ne’e bele hetan rendimentu.

Prezidente hatutan, buat ne’ebé ba Timor-Leste mak dala ruma ita hein dala ruma ita dehan Governu tenke apoia, ou instituisaun fó apoiu maibé se apoiu ne’e ita la transforma ba planu ka halo programasaun ruma ne’ebé ke di’ak ba ita nia komunidade nia parte hanoin tinan ba tinan ita hein nafatin apoiu hosi ajénsia seluk ou apoiu hosi Estadu.

“Agora buat ne’ebé ha’u dehan importante liu mak atu komersial ka rádiu komunidade, presiza planu dezenvolvimentu ne’ebé ke forte atu nune’e iha Misaun rua, ida maka hato’o informasaun ba públiku nian maibé ida mós atu hetan rendimentu atu bele sustenta iha sira nia moris ne’e mós metin,” prezidente esplika.

Primeiru Kongresu ne’ebé halo durante loron tolu nia laran ne’e, Ensera direitamente hosi Prezidente Asembleia Jerál RCA nian, Jorge Silva, Prezidente Exerccício ARIC, Miguel Guarda, Prezidente Camara Municipal de Angra do Heroismo, José Gabriel de Menezes, no Sekretáriu Regional Adjunto Prezidéncia para os Assuntos Parlamentares, José Bento Branco Messias, iha edifísiu Centro Cultura e de Congressos de Angra do Heroismo, Ilha Terceira, Açores.**