Previous Next

Prezidente CI: Karteira profisionál no Oinsá Atu Asesu ba Profisaun Jornalista

Díli – Prezidente Conselho de Imprensa de Timor-Leste (CI), Virgílio da Silva Guterres, sai nu’udar oradór iha atividade workshop CEFTEC ho tema “Avaliasaun Jerál ba Atividade Formasaun Períodu 2019”.

Atividade workshop, realiza hosi Sentru Formasaun Técnica em Comunicação (CEFTEF – Sigla Portuges), iha Tersa-feira (29/10/2019), iha salaun Tower conference, Fatuhada – Díli, ho objetivu atu halo avaliasaun jerál kona-ba lala’ok formasaun ne’ebé halo ona durante períodu 2019 nian.

Prezidente CI, Virgílio da Silva Guterres hetan fiar husi CEFTEC hodi sai nu’udar oradór prinsipál ida hodi ko’alia iha workshop ho tema  “Karteira Profisionál no Oinsá Atu Asesu ba Profisaun Jornalista”.

Iha intervensaun, Prezidente CI, dehan formasaun ne’ebé CEFTEC fasilita ba partisipantes sira, ikus mai bele fasilita sira sistemátiku no organizadu hodi bele identifika sasán tuir ninia fatin.

Prezidente CI fó komparasaun ida katak bainhira ema ida tantu feto ka mate kuandu iha ona karteira ne’e hatudu katak nia adultu ona. Tanba ne’e, karteira profisionál ne’e atribui ba ema sira ne’ebé hala’o knaar professional iha instituisaun ida.

“Karteira Profisionál katak sertifikasaun ba ema ne’ebé iha juizu ona atu julga no ba jornalista, iha buat tolu, primeiru, kapasidade téknika, segundu, kapasidade professional, no terseiru, kapasidade intelektuál,” esplika prezidente CI.

Prezidente argumenta katak serbisu jornalízmu iha kestaun tolu ne’e maka importante tanba nia (jornalista) atu rekolla informasaun no dadus husi fonts barabarak, jornalista presiza téknika professional hanesan téknika atu uza camera, hakerek no téknika edisaun. 

Kapasidade professional, tuir prezidente CI katak atu hakru’uk ba kóde étika jornalista, kapasidade atu halakon nia interese pesoál, hodi tau as liu interese komún. No ikus liu maka kapasidade intelektuál signifika katak jornalista sira la’ós atu rekolla faktu no hatudu faktu de’it maibé jornalista mós tenke iha kapasidade atu interpreta faktu no atu kombina faktu ho dadus sira.

sekretáriu Estadu Komunikasaun Sosiál, liuhosi Diresaun Nasionál Sentru Formasaun Téknika iha Komunikasaun – CEFTEC finaliza ona kursu formasaun kualifikasaun nasionál iha komunikasaun no mídia ho unidade lima no kursu komunikasaun novas teknolojia informasaun ba seitór públiku no privadu ho unidade neen, durante tinan 2019. (CI).


Imprimir   Email