Previous Next

Atu Susesu Iha Vida Jornalizmu Tenke Rona, Hakerek no Hato’o ho Loloos.

Balibó,  Administradór Postu Balibó, Rosario Gonsalves, wainhira taka komemorasaun trajédia Balibó, 16/10/2019, husu ba jornalista sira asuntu prinsipál tolu katak, “atu bele susesu iha jornalista, ida maka rona, rona ho loloos, rua hakerek, hakerek ho loloos, tolu hato’o, hato’o ho loloos.”

Prezidente CI, Virgílio da Silva Guterres, iha oportunidade hanesan promete katak, “ba tinan oin, bainhira ita organiza didi’ak, ita bele bolu kantór sira, múziku sira mai, poeta sira mai, pintores sira atu mai pinta, sira ne’ebé mak hakerek livru atu mai diskute kona ba sira nia livru, buat sira ne’e hola parte iha mídia.”

Prezidente CI mós kontinua fo hanoin atu la haluha sakrifísiu jornalista nain lima ne’ebé mate iha Balibó katak, “ho sakrifísiu sira ne’e, ita buka oinsá atu halo moris ne’e la’o ba oin, kontinua ba oin, hodi la haluha sira nia sakrifísiu.”

Komemorasaun tinan 44 trajédia Balibó iha tinan ida ne’e hala’o iha loron 15 - 16 Outubru, iha arredores Balibó ninian, ne’ebé hetan partisipasaun maximu hosi Prezidente CI, Membru no Ezekutivu CI, Sekretáriu Estadu Komunikasaun Sosiál, Prezidente RTTL,ep, Prezidente Ajénsia TATOLI, Prezidente Asosiasaun Jornalista sira, Prezidente Autoridade Munisípiu Bobonaro no estrutura, Autoridade Local sira, Komandante PNTL Munisípiu Bobonaro, Jornalista Timoroan, Estudante komunikasaun sosiál UNTL no UNITAL, Jornalista na’in lima hosi Indonézia,.

Jornalista na’in lima ne’ebé mate, mai hosi televizaun kanál 7 no kanál 9 maka hanesan, Greg Shackleton (29), Tony Stewart (21), sira na’in rua ne’e mai hosi Australia no serbisu hamutuk o Gary Cunninghan (27), hosi Nova Zelandia ne’ebé serbisu ba estasaun televizaun kanál 7 iha Melbourne. Entretantu, Briam Peters (26) no Malcolm Rennie (29), sira na’in rua husi Inglaterra no serbisu ba estasaun televizaun kanál 9 ne’ebé sentru iha Sydney.


Imprimir   Email