Balibó – Prezidente Conselho de Imprensa de Timor-Leste (CI), Virgílio da Silva Guterres, inaugura uma Balibó Trails Guide, iha ámbitu komemorasaun loron trajédia Balibó V, iha loron 16/10/2019.
Balibó Trails hanesan kooperativa matadalan ida ba suku neen (6) iha postu administrativu Balibó, Timor-Leste. Pesoál matadalan sira iha Balibó trails, uza sira nia koñesimentu lokál kona-ba kultura, jeografia, rekursu naturais, istória no tradisaun hodi kria esperiénsia únika iha viajen.
Turista sira ne’ebé vizita Balibó maka sei hetan esperiénsia hanesan la’o ain ho distánsia besik no dook, ho bisikleta ba fatin sira fásil nomós difisil hanesan ba foho lolon sira.
Prezidente CI, Virgílio da Silva Guterres, iha nia intervensaun hatete mundu ohin loron koñese ona Balibó, agora, esforsu ita nian maka oinsá atu lori mundu mai Balibó.
“Sé mídia sira hakarak lori Timor ba mundu, Balibó trails sira nia esforsu tenke lori mundu mai Timor, tanba turizmu ne’e hanesan primadona ba dezenvolvimentu Timor, tanba ne’e maka ita tenke fó apresiasaun ba inisiativa hosi maluk sira ne’ebé hahú hosi grupu sira hanesan ne’e,” esplika Prezidente CI.
Prezidente CI husu atu matadalan ne’ebé lori turista sira, atu konta istória Balibó ba sira “tanba ita sei la lori Timor ba Mundu”, ita konta istória ba turista sira mak sei lori Timor ba Mundu.
Tuir prezidente autoridade munisípiu Balibó katak oras ne’e daudaun kada fin de semana, vizitante sira barak tebes, nune’e, iha futuru autoridade munisipál sei estabelese tan otelaria balun hodi atende ba nesesidade vizitante sira ne’e.
Komemorasaun tinan 44 trajédia Balibó iha tinan ida ne’e hala’o iha loron 15-16 Outubru, iha arredores Balibó ninian, ne’ebé hetan partisipasaun maximu hosi Prezidente CI, Membru no Ezekutivu CI, Sekretáriu Estadu Komunikasaun Sosiál, Prezidente Autoridade Munisípiu Bobonaro no estrutura autoridade local sira, Komandante PNTL munisípiu Bobonaro, jornalista timoroan, estudante komunikasaun sosiál UNTL no UNITAL, jornalista na’in lima hosi indonézia.
Jornalista na’in lima ne’ebé mate, mai hosi televizaun kanál 7 no kanál 9 maka hanesan, Greg Shackleton (29), Tony Stewart (21), sira na’in rua ne’e mai hosi Australia no serbisu hamutuk o Gary Cunninghan (27), hosi Nova Zelandia ne’ebé serbisu ba estasaun televizaun kanál 7 iha Melbourne. Entretantu, Briam Peters (26) no Malcolm Rennie (29), sira na’in rua husi Inglaterra no serbisu ba estasaun televizaun kanál 9 ne’ebé sentru iha Sydney.