Balibó, Iha komemorasaun Trajédia Balibó ba dala 44, iha Postu Administrativu Balibó, Munisípiu Bobonaro, 15/10/2019, iha sesaun “Kalan Reflesaun I”, ho tema “Jornalizmu Livre atu Asegura Direitu Umanu”., Sekretáriu Estadu Komunikasaun Sosiál, Mericio Juvinal dos Reis ‘Akara’, iha aprezentasaun hateten, “too agora ita seidauk iha Lei, Undang Undang Penyiaran, Lei Radio Divuzaun.”
“Governu agora, liuliu Sekretáriu Estadu Komunikasaun Sosiál, iha komitmentu atu halo draft kona ba Lei Radio Divuzaun,” esklarese Sekretáriu Estadu.
Sekretáriu Estadu subliña, “espera antes Dezembru tinan ne’e iha ona esbosu, para depois loke ba diskute, loke ba debate, husu Conselho Imprensa para atu diskute, atu kontribui hotu, para tinan oin hanesan ne’e ita bele iha draft final. Ne’e la’ós atu limite liberdade espresaun mas atu reforsa, atu jere, para ita nia servisu sira ne’e sai sehat liu, kontribui ba healthy Democracy, demokrasia saudavel, tanba espasu públiku, spectrum públiku, ne’e direitu sidadaun hotu-hotu nian, ita hotu nian. ita hanesan mídia labele uza spectrum públiku ne’e ho sala.”
Prezidente Asosiasaun Jornalista Timor Lorosa’e (AJTL), David Hugo, ko’alia kona ba papél AJTL nian katak, “papél importante ida atu hakbiit jornalista sira nia kapasidade iha area oioin pertense ba halo kobertura ninian, papél seluk halo advokasia ba servisu jornalista nian.”
Iha sesaun “Kalan Reflesaun II”, foka aprezentasaun ho tema “Jornalizmu Pasadu, Prezente no Futuru” ho oradór mak Reprezentante Comisaun Nasionál Chega (CNC), Nolasco Mendes no Prezidente Conselho de Imprensa de Timor-Leste (CI), Virgilio da Silva Guterres.
Papél imprensa iha prosesu luta, kontinua valoriza sakrifísiu jornalista nian ba libertasaun povu no patria, Konservasaun fatin istóriku sira nu’udar pontu ne’ebé ko’alia iha sesaun “Kalan Reflesaun II” ne’e.
Sesaun Kalan Reflesaun remata ho toka video dokumentáriu ho títulu “Lia Los La Mate”, ne’ebé hato’o istória hosi vítima, sobrevivente no testemuña ba trajédia Balibó iha tinan 44 liu ba.
Jornalista na’in lima ne’ebé mate, mai hosi televizaun kanál 7 no kanál 9 maka hanesan, Greg Shackleton (29), Tony Stewart (21), sira na’in rua ne’e mai hosi Australia no serbisu hamutuk o Gary Cunninghan (27), hosi Nova Zelandia ne’ebé serbisu ba estasaun televizaun kanál 7 iha Melbourne. Entretantu, Briam Peters (26) no Malcolm Rennie (29), sira na’in rua husi Inglaterra no serbisu ba estasaun televizaun kanál 9 ne’ebé sentru iha Sydney.