Balibó, Iha serimónia komemorasaun akontesimentu Balibó ne’ebé jornalista estranjeiru nain lima hosi Australia no Nova Zelandia ho naran Brian Peters, tinan 29, Malcolm Rennie, tinan 28, Gary Cunningham, tinan 27, Gregory Shackleton, tinan 29 no Anthony Stewart, tinan 21, mate wainhira hala’o kobertura kona-ba infiltrasaun militár Indonézia iha postu Administrativu Balibó, Munisípiu Bobonaru, Sekretáriu Estadu Komunikasaun Sosiál (SECOMS), Mericio Juvenal dos Reis “Akara”, iha diskursu ko’alia katak, “knar jornalista importante los, la’ós de’it desimina informasaun maibé sira sai ajente ida defende direitu fundamental sidadaun nasaun ida ninian hanesan sira nain lima hatudu.”
SECOMS, Mericio, hatutan katak, “sira reporta kondisaun iha momentu ne’ebá iha ita nia rai, kondisaun grave violasaun direitu umanu, ba nasaun sira ne’ebé maka sira karik la hatene saida mak akontese iha ita nia rai, liu sira nain lima nia reportajen, ema bele hatene, bele akompaña e ema bele halo asaun ruma.”
SECOMS, Mericio rekoñese eventu ne’ebé Conselho de Imprensa organiza no realiza ne’e importante no iha valor as, “eventu sira hanesan ne’e nia valor as liu tanba ho espíritu valor ne’ebé as, konsidera sira nain lima hanesan parte importante husi ita nia istória.”
Sekretáriu Estadu Komunikasaun Sosiál (SECOMS), Mericio Juvenal dos Reis “Akara”, fó apresiasaun bot mós ba família hosi jornalista nain lima, kolega hosi jornalista nain lima no sidadaun Australia no Nova Zelandia.
Atividade iha komemorasaun ne’e mak hanesan kalan reflesaun, exposizaun fotografia, loke reportajen dokumentáriu, jogu amizade entre komunidade mídia ho populasaun Balibó, Misa agradesimentu, Vizita Museum Balibó House no Sunu Lilin e Kari Ai funan iha fatin akontesimentu jornalista nain lima mate iha Postu Administrativu Balibó, Munisípiu Bobonaro, hahú iha loron 15 - 17 fulan Outubru tinan 2019.
Programa ne’e, organiza hamutuk ho Asosiasaun Jornalista Timor – Leste, Timor-Leste Press Union (TLPU) inklui ho autoridade lokál Munisípiu Bobonaro ne’ebé sei partisipa hosi jornalista sira, responsavel órgaun no meius komunikasaun sosiál, asosiasaun jornalista, Sekretária Estadu Komunikasaun Sosiál, Autoridade Munisípiu Bobonaro no Postu Administrativu Balibó inklui konvidadu sira seluk.