Balibó, Conselho de Imprensa de Timor-Leste (CI), serbisu hamutuk ho Asosiasaun Jornalista Timor-Leste (AJTL), Timor-Leste Press Union (TLPU) no Postu Administrativu Balibo, hodi komemora loron trajédia Balibo V, ba-dala 44.
Komemorasaun ne’e, hala’o durante loron rua, hahú hosi loron 15-16 Outubru, iha arredores Balibó ninian, ne’ebé hetan partisipasaun maximu hosi Prezidente CI, Membru no Ezekutivu CI, Sekretáriu Estadu Komunikasaun Sosiál, Prezidente Autoridade Munisípiu Bobonaro no estrutura autoridade local sira, Komandante PNTL munisípiu Bobonaro, jornalista timoroan, estudante komunikasaun sosiál UNTL no UNITAL, jornalista na’in lima hosi indonézia.
Trajédia Balibó V, koñesidu ho akontesimentu iha tinan 1975, tropa indonézia hosi ekipa Suzi no Batallaun 2a Brigada Infantária lansa atake ba Balibó no iha loron 16 Outubru 1975, sira oho jornalista internasionál na’in lima ne’ebé halo kobertura kona-ba operasaun militár indonézia mai área Timor-Leste.
Iha abertura, Prezidente CI Virgílio da Silva Guterres, sente haksolok tanba ita sei iha biban atu bele komemora loron importante trajédia Balibó.
“Balibó V nu’udar komemorasaun ida ne’ebé nia sentidu barak liu, dala ruma ema hanoin ba jornalista sira ka ba liberdade imprensa de’it. Ita tenke halo luan tan ninia reflesaun kona-ba komemorasaun ida ne’e, ita hanoin kona-ba liberdade,” esplika Prezidente CI.
Nia hatutan, 16 Outubru sai koñesidu depois de ita restaura independénsia, tanba dala barak ita koñese liu loron 7 Dezembru nu’udar loron ida ne’ebé Militár Indonézia halo invazaun ba Timor-Leste.
Prezidente Conselho de Imprensa hato’o agradese wa’in ba autoridade sira iha munisípiu Bobonaro, liuliu Postu Balibó, no mós ba Sekretáriu Estadu Komunikasaun Sosiál (SECOMS), hein katak bele serbisu hamutuk di’ak liután iha future.
Atividade komemora trajédia Balibo V maka hanesan, loron dahuluk (15/10), abertura ba atividade hosi Prezidente CI, Prezidente Autoridade Munisípiu Bobonaro no Sekretáriu estadu Komunikasaun Sosiál. Kontinua kedan ho kalan reflesaun hodi fahe esperiénsia hosi Prezidente CI, SECOMS, CNC, AJTL.
Tama ba loron daruak (16/10), hahú ho misa agradesimentu iha Balibó, Vizita monumentu Balibó, iha parte loraik, inagura Balibó Trails Guide no kontinua ho jogu amizade entre ekipa hosi Dili hasoru balibo oan, ikus liu, ensera atividade hodi taka ho divertimentu ne’ebé hetan animasaun hosi artista legendáriu, Tony Pereira.