Conselho de Imprensa de Timor-Leste (CI), hala’o mandatu konstitusionál tuir estatutu CI nian iha artigu 44 hodi promove liberdade imprensa no liberdade espresaun. Relasiona ho mandatu referee, Conselho de Imprensa dezde hahú kedan estabelese iha loron 10 Maiu 2016, iha loron ne’ebé membru CI sira simu pose hosi parlamentu, tau kedan prioridade ida importante hodi sosializa Lei Komunikasaun Sosiál no regulamentu sira CI nian.
Iha tinan 2017, Conselho de Imprensa hala’o ona Sosializasaun lei komunikasaun sosiál no regulamentu sira CI nian ba autoridade lokal sira iha munisípiu 12, inklui Rejiaun Autónoma Espesiál Oecussi Ambeno (RAEOA). Iha tinan 2019, Conselho de Imprensa kontinua hala’o Sosializasaun Lei KOMSOS no regulamentu CI nian ba Autoridade Seguransa hosi munisípiu tolu hanesan Viqueque, Bobonaro, Covalima, inklui RAEOA. Kinta-feira, loron 10 Outubru 2019, Conselho de Imprensa realiza hikas atividade Sosializasaun lei KOMSOS ba Autoridade Seguransa RAEOA.
Atividade Sosializasaun ne’e loke direita hosi Prezidente Conselho de Imprensa, Virgílio da Silva Guterres no Segundu Komandante PNTL RAEOA, Superintendente Asistente, Paulino Carmo Pereira. Prezidente CI, Virgílio da Silva Guterres dehan, dala barak jornalista ho PNTL maka sempre kruza malu iha terenu hodi hala’o serbisu ba atendimentu públiku nian. tanba ne’e, dalabarak jornalista ho PNTL sempre mosu dezentendiementu entre parte rua. Nune’e, Prezidente CI esklarese, liuhosi Sosializasaun lei komunikasaun sosiál no regulamentu sira Conselho de Imprensa nian, bele ajuda parte PNTL RAEOA hodi bele serbisu di’ak liután ho jornalista sira iha terenu.
“Profisaun rua ne’e (Jornalista ho PNTL), sira kuaze lorloron kruza ka hasoru iha terenu. Tanba sira nia funsaun ka responsabilidade haruka sira tenke iha ne’ebá. Polísia iha ne’ebá atu garante orden públika, jornalista sira iha ne’ebá atu garante informasaun públiku,” esplika prezidente CI. Prezidente argumenta, Sosializasaun ne’e bele hamosu entendimentu ida ne’ebé sufisiente entre PNTL ho profisionál sira ne’ebé serbisu iha komunikasaun sosiál.
Iha parte seluk, segundu komandante PNTL RAEOA, Superintendente Asistente, Paulino Carmo Pereira hato’o agradese wa’in ba Conselho de Imprensa ne’ebé ona fahe informasaun balun kona-ba serbisu órgaun no meiu komunikasaun sosial sira nian ne’ebé iha relevante mós ho atividade PNTL ninian.
Komandante PNTL RAEOA ne’e esklarese, iha rai ketan, PNTL sempre iha relasaun di’ak ho maluk jornalista sira liuliu rádiu komunidade Oecussi. Nia dehan jornalista iha Oecussi ho PNTL sira sempre serbisu hamutuk iha terenu.
“Jornalista iha nia papél importante tuir lei ne’ebé maka iha. Sira hala’o knaar tuir misaun, ne’ebe mak haktuir iha lei. Polísia mós hanesan tuir legál hotu-hotu ne’ebé maka fó podér nune’e polísia bele hala’o nia misaun hanesan membru seguransa internal iha país ida ne’e,” akresenta Superintendente Asistente, Paulino Carmo Pereira. Komandante ne’e husu nafatin ba jornalista sira atu kontinua serbisu hamutuk ho PNTL hodi hala’o knaar tuir idakidak nia Kompeténsia.
Regulamentu sira ne’ebé Conselho de Imprensa Produz ona maka hanesan kode étika jornalístika, prosedimentu mediasaun, direitu resposta no retifikasaun, formatu eletróniku media cyber, rejistu órgaun no meiu komunikasaun sosiál, prosedimentu hato’o keisa iha Conselho de Imprensa, regulamentu karteira professional, regulamentu atribuisaun prémiu ba jornalista sira, regulamentu dixiplinar kontra jornalista sira.
Partisipa iha atividade Sosializasaun Lei KOMSOS, Segundo Komandante PNTL RAEOA, Superintendente Asistente, Paulino Carmo Pereira, Prezidente Conselho de Imprensa, Virgílio da Silva Guterres, komandante eskuadra sira, polísia komunitáriu, rádiu komunidade Oecussi, nomór funsionáriu hosi CI. Partisipantes hamutuk ema na’in 40 resin. (CI)