Díli – Conselho de Imprensa de Timor-Leste (CI), Sekretáriu Estadu Ambiente (SEA) no ajénsia Programa Nasoens Unidas ba Dezenvolvimentu (PNUD/UNDP), realiza Semináriu ho tema “Jornalízmu: Salva Ambiente”, ba mídia nasionál sira.
Atividade ne’e, realiza hodi konsensializa hanoin krítiku jornalista sira nian kona-ba kestaun ambiente hodi bele sensibiliza mídia iha serbisu lorloron nian.
Prezidente Conselho de Imprensa de Timor-Leste, Virgílio da Silva Guterres hatete, asuntu meiu ambiente, ohin loron, sai ona snu’udar preokupasaun globál. Responsavél maximu CI ne’e dehan, Timor-Leste tama iha pozisaun 10 as liu, nu’udar nasaun ida ne’ebé vulnerável liu ba dezastre naturais.
“Problema boot iha Timor maka mudansa atitude ne’ebé difísil tebes atu ita muda. Tanba ita barak dalaruma hanoin katak hahalok ne’e kiikoan maibé ita la hanoin kona-ba nia impaktu,” esplika Prezidente CI.
Virgílio da Silva Guterres akresenta, mezmu jornalista kleur ona, iha esperiensia barak ona maibé presiza nafatin formasaun kontinua tanba mudansa teknolojia iha mundu no mudansa klimátika nune’e jornalista sira presiza nafatin adapta ho mudansa sira ne’e.
Iha parte seluk, Sekretáriu Estadu Meiu Ambiente, Demetrio do Amaral de Carvalho dehan liuhosi semináriu ne’e, jornalista sira hamutuk ho CI no SEA, hah’u hanoin oinsá maka bele muda sosiedade ida nia mentalidade kona-ba asuntu meiu ambiente ninian.
“Ha’u hahú kedan dehan, serbisu ne’e atu hahú muda sosiedade ida, tanba imi maka troka ema nia hanoin. Ema nia hanoin hodi hare ambiente ne’e bainbain de’it, sai ema ida ne’ebé hare ambiente ne’e hanesan buat ida ne’ebé labele husik iha nia moris,” esplika Demetrio.
Nia reforsa, papel jornalista importante tebes iha prosesu tomak konstrusaun estadu nian liuhosi serbisu jornalízmu nian ne’ebé didika ba área temátiku sira hanesan asuntu ambiente ninian.
Resident Representative PNUD, Munkhtuya Altangerel, kontente bainhira hare jornalista sira partisipa iha treinamentu refere, tanba serbisu jornalista nian todan tebes liuhosi meiu online nomós kobertura sira iha terenu.
“toópiku salva ambiente, ita ko’alia bebeik, maibé agora ita sei ko’alia topiku sira ho maneira ida ne’ebé diferente uituan,” esklarese Munkhtuya.
Partisipa iha treinamentu ne’e, jornalista sira hamutuk 53, mai hosi mídia nasional sira. Tuir planu, formasaun ne’e sei hala’o durante loron hat, hahú 08-11/10/2019, ne’eb’e realiza iha salaun Otel Timor. (CI)