Previous Next

CI no SEA Estabelese Nota Kooperasaun

Dili- Conselho de Imprensa de Timor-Leste (CI) no Sekretariu Estadu Ambiente (SEA), estabelese ona nota kooperasaun atu konsiensializa jornalista timoroan sira liuhosi treinamentu kona-ba asuntu ambientál.

Nota kooperasaun ne’e, ofisializa ona liuhosi asinatura ida entre Prezidente CI, Virgilio da Silva Guterres no Sekretariu Estadu Ambiente, Demetrio do Amaral de Carvalho, ne’ebe realiza iha Otel Timor, tersa-feira (08/10/2019).

Nota kooperasaun ne’e, atu atinji nia metas haat importante maka hanesan, primeiru, atu jornalista sira konsiente no informadu kona-ba asunte ambientál, segundu, fo kapasitasaun ba jornalista atu hatene didiak asuntu ambientál, terseiru, hasa’e kuantidade notisia ho akurasia kona-ba ambiente iha Timor-Leste, kuartu, populasaun sira bele informadu liutan no sensivel ba prezervasaun ambientál no dezenvolvimentu sustentavel.

Konsiensia ambientál importante tebes hodi transforma sidadaun sira nia partisipasaun ativu iha protesaun embiente nian. Tanba ne’e, MoU entre CI ho SEA bele hamosu hanoin kritiku kona-ba kestaun ambiente hodi sensibiliza jornalista sira no publiku hodi hare besik liu kestaun ambientais, hodi reforsa kapasidade jornalista sira atu bele elabora informasaun ambiente nian iha sira nia serbisu lorloron.

Partisipa mós iha serimonia asinatura nota entendimentu ne’e mak hanesan Resident Representative PNUD, jornalista sira, diretores no funsionariu sira hosi Conselho de Imprensa no Sekretaria Estadu Ambiente.(CI)


Imprimir   Email