Dili, Estrutura Conselho de Imprensa de Timor-Leste (CI) kompostu hosi Prezidente CI, Virgílio da Silva Guterres, Membru CI no Ezekutiva CI, hala’o enkontru kortezia ho Sekretáriu Estadu Komunikasaun Sosiál (SEKOMS), Merício Juvenal dos Reis ‘Akara’ hodi ko’alia kona-ba kooperasaun no koordenasaun servisu e komemorasaun loron Balibó Five.
Iha enkontru kortezia ne’ebé realiza iha Tersa, 1/10/2019, iha Pallasu Governu, Prezidente CI, hato’o mós asuntu importante sira hanesan, Atribuisaun Karteira Professional no nomeasaun Fiskál Uniku.
Asuntu seluk ne’ebé Conselho de Imprensa ko’alia mak utilizasaun Fundus Dezenvolvimentu Capital Umanu no CI asina akordu ho Thai Public Broadcasting Service (Thai PBS) hodi halo Dokumentáriu iha Timor-Leste iha tempu badak.
Prezidente CI, liu hosi enkontru ne’e, konvida Sekretáriu Estadu Komunikasaun Sosiál (SEKOMS), Merício Juvenal dos Reis ‘Akara’ hodi bele partisipa iha komemorasaun loron Balibó Five ne’ebé Conselho de Imprensa hamutuk ho Centro Nasionál Chega (CNC) inklui Organizasaun Mídia hanesan AJTL, TLPU, sei selebra iha fulan Outubru nia mai ne’e.
Aproveita oportunidade ne’e Prezidente CI mós apresia programa Governu nian liuliu programa SECOMS nian kona-ba Naroman ba Suku.
Fó hanoin mós ba SECOMS kona-ba prosesu digitalizasaun RTTL,ep no mós fó komparasaun balun sobre digitalizasaun ne’ebé halo iha rai seluk.
Responde ba Audiensia ne’e, Sekretáriu Estadu Komunikasaun Sosiál (SEKOMS), Merício Juvenal dos Reis ‘Akara’, esplika kona-ba prosesu sira ne’ebé durante ne’e hala’o ona no saida mak presiza atu halo ba oin.