Previous Next

CI Sosializa Lei KOMSOS ba Autoridade Siguransa Bobonaro

Bobonaro, Conselho de Imprensa de Timor-Leste (CI), realiza sosializasaun Lei komunikasaun Sosiál (KOMSOS), ba autoridade Seguransa, Polisia Nasionál Timor-Leste (PNTL), munisípiu Bobonaro, kinta-feira (19/09/2019), iha salaun enkontru PNTL Bobonaro.

Tuir lei komunikasaun sosiál, Conselho de Imprensa maka implementa lei refere ho nia baze legal maka temi iha artigu 42 husi Lei KOMSOS iha númeru 2 hodi autoriza hamosu dekretu lei númeru 25/2015.

Iha intervensaun abertura, Prezidente Conselho de Imprensa, Virgílio da Silva Guterres, esplika objetivu hosi sosializasaun ne’e atu bele fahe hanoin balu kona-ba responsabilidade sira CI ho PNTL, tanba dala barak liu hala’o iha serbisu iha báze, jornalista sira ho polísia maka sempre hasoru malu. “Polísia ho Jornalista ne’e, pozisaun rua ne’ebé maka ninia frekuénsia kruza malu iha kampu ne’e kuaze bebeik. Polísia sira atu garante orden públika no jornalista sira nia serbisu mós atu garante informasaun ba públiku,” dehan Prezidente CI.

Prezidente informa ba ofisiál Polísia sira kona-ba artigu balun ne’ebé limitasaun ba liberdade imprensa nomós parte balun ne’ebé hanesan ofisiál polísia estadu nian labele halo. Komandante PNTL, Munisípiu Bobonaro, Octavio de Souja Bucar hato’o agradese wa’in ba Conselho de Imprensa, tanba bele fahe ona informasaun ba malu atu labele hamosu dezentendimentu entre PNTL ho Jornalista iha terenu. “Ita ho mídia sira maka sempre hasoru malu iha terenu, ita koñese malu di’ak, entaun ita bele fahe ba malu di’ak liutan nune’e bainhira ita hala’o serbisu iha terenu, informasaun ne’e labele falla,” esplika Komandante PNTL Bobonaro. Partisipa iha atividade sosializasaun ne’e, Komandante PNTL Bobonaro, Prezidente CI, kuadrus PNTL Bobonaro, autoridade lokál balun, inklui jornalista RTTL.EP no rádiu komunidade bobonaro.

Antes ne’e, CI halo ona atividade hanesan iha Munisípiu Viqueque nomós turi planu sei realiza mós iha munisípiu Covalima no Oe-Cussi. Iha atividade sosializasaun ne’e, CI esplika kona-ba Lei KOMSOS, prosedimentu ba direitu hatan no retifikasaun no prinsípiu jerál aplika ba órgaun no meiu komunikasaun sosiál iha format eletróniku.


Imprimir   Email