Viqueque, Conselho de Imprensa de Timor-Leste (CI), realiza Sosializasaun Lei Komunikasaun Sosiál no Regulamentu sira CI nian, hanesan, prosedimentu ba direitu hatán no retifikasaun no mós prinsípiu jerál sira ne’ebé bele aplika ba órgaun no meiu sira komunikasaun sosiál nian iha formatu eletróniku ka media cyber, ba PNTL no Xefe Suku, iha salaun Enkontru Wekeke, Quarter Jerál PNTL Munisípiu Viqueque.
Membru Conselho de Imprensa de Timor-Leste, Konselleiru, José Maria Ximenes, iha sesaun abertura esplika sobre se mak Conselho de Imprensa, saida mak Conselho Imprensa halo no tanba saida e oinsá Conselho de imprensa eziste. Konselleiru, José, hatutan nia esplikasaun sobre Sosializasaun katak, “hotu-hotu hala’o nia profisaun profisionál, Jornalista halo nia profisaun jornalizmu atu informa, nune’e mós parte Polísia, PNTL, hala’o nia knar hanesan tuir Lei no Orden, tan ne’e, ha’u hanoin, sorumutu ne’e importante tebetebes, ekipa téknika Conselho de Imprensa mai iha ne’e atu sosializa regulamentu sira ne’ebé jornalista sira tenke halo, devér ne’ebé sira iha, nune’e, parte Polísia mós komprende, nune’e mós, servisu Polísia nia, bele iha entendimentu entre servisu profisionáis sira ne’e.”
Sosializasaun ne’e loke ofisiálmente hosi Superintendente Asistente Komandante PNTL Munisípiu Viqueque, Eduardo Campos. “Hanoin katak, sensibilizasaun ne’e importante ba ita hotu hanesan ajente seguransa estadu ninian, ita presiza komprende didi’ak saida mak jornalista, saida mak Conselho de Imprensa, atu nune’e ita bele servisu hamutuk iha futuru, tanba ita nia objetivu ida de’it, ita hotu-hotu serve rai ida ne’e, estadu ida ne’e, dala ruma ita ladún intende didi’ak ita hotu nia servisu, iha terenu ita hatudu liman ba malu, dala ruma jornalista atu foti imajen ruma kona ba Polísia nia servisu, dala ruma ita halo impedementu, ida ne’e dala ruma tanba ita la komprende didi’ak saida mak jornalista nia servisu, liu husi workshop ita bele komprende, ita bele intende didi’ak saida mak jornalista nia servisu, hodi nune’e, ita bele servisu hamutuk di’ak liután, Jornalista nia servisu, liuliu Polísia nia servisu, sira halo kobertura ruma iha terenu, husu atu ita koopera.”
Diretór Diresaun Apoiu Juridiku, Conselho de Imprensa, Olderiko da Kosta no Ofisiál Apoiu Juridiku, Antonito dos R. Baptista, halo aprezentasaun espesífiku kona ba Lei Komunikasaun Sosiál no Regulamentu sira CI nian hanesan prosedimentu ba direitu hatán no retifikasaun, no mós prinsípiu jerál sira ne’ebé bele aplika ba órgaun no meiu sira komunikasaun sosiál nian iha formatu eletróniku ka media cyber.
Iha sesaun husu no hatán, PNTL no Xefe Suku sira kestiona kona ba informasaun sira labele fó sai ka konsidera hanesan segredu estadu maibé jornalista sira husu no buka atu hatene, mídia sosiál sira ne’ebé publika informasaun falsu no edita arbiru foto Nai Ulun sira, saida mak presiza halo bainhira obra jornalista nian ne’ebé publika halo ema sente ofendidu no servisu hamutuk oinsá mak presiza halo hamutuk iha terenu entre Polísia no Jornalista sira, oinsá mós bele identifika jornalista ho loloos.
Hatán ba asuntu ne’e, Diretora Ezekutiva CI, Ana Teresa Sequeira, esplika kona ba direitu hatán no retifikasaun no mós ida ne’ebé mak mídia konvensional ne’ebé mak profisionál. Diretora ne’e mós esplika tan katak, “dala ruma ita hare ema naran kaer camera, nia dehan nia jornalista, mas la’ós, nia seidauk jornalista, dala ruma nia mai hosi grupu balu para ba interese grupu nian ka la hatene, maibé tanba de’it nia tara camera rebo-rebo, ita hanoin nia jornalista mais tuir loloos nia la jornalista, tanba ne’e, ita bot sira, wainhira sira ba entrevista karik husu ba sira dehan katak favor hatudu mai ami, hatudu mai ha’u, ita bot nia karteira profisionál ne’ebé mak Conselho de Imprensa fó, se sira hatudu, ita bot sira bele fó informasaun ba sira, se lae ita bot sira bele rejeita la fó informasaun ba sira.”
Iha Sosializasaun ne’e, CI entrega rekordasaun ba PNTL no Xefe Suku. Sosializasaun Lei Komunikasaun Sosiál no Regulamentu sira CI nian ne’ebé partisipa hosi PNTL no Xefe Suku sira ho totál 60 partisipantes ne’e taka ofisiálmente hikas fali hosi Superintendente Asistente Komandante PNTL Munisípiu Viqueque, Eduardo Campos.
Alein ne’e, Conselho de Imprensa realiza mos diskusaun radio iha Radio Komunidade Povu Viqueque kona ba Lei Komunikasaun Sosiál no Regulamentu sira CI nian ho Oradór mak Membru Conselho de Imprensa de Timor-Leste, Konselleiru, José Maria Ximenes no Superintendente Asistente Komandante PNTL Munisípiu Viqueque, Eduardo Campos.