Díli – Conselho de Imprensa de Timor-Leste (CI), serbisu hamutuk ho Komunidade Rede Kreatividade Fotógrafu, komemora loron mundiál foto hodi realiza workshop ida durante loron sorin ho tema “Papél Fotografia iha Rezisténsia no Dezenvolvimentu Timor-Leste”.
Komemorasaun ne’e nu’udar parte ida hosi kontinuasaun komitmentu atividade sira Conselho de Imprensa nian hodi bele valoriza produtu jornalístiku iha área fotografia ninian.
“Komemorasaun ne’e hanesan konfirmasaun hosi Conselho de Imprensa nian esforsu ida ne’ebé atu tau jornalízmu foto sai hanesan xave ida iha diseminasaun informasaun ba públiku,” esplika Prezidente Conselho de Imprensa, Virgílio da Silva Guterres, Iha intervensaun, ohin (22/08/2019) bainhira komemora loron mundiál foto ne’ebé monu iha loron 19 Agostu, iha Otel Garden Beach, Praia dos Coqueiros, Dili.
Nia akresenta CI kontinua enkoraja maluk fotografu sira tuir kbiit ne’ebé CI iha hodi dezenvolve fotografu sira iha mundu jornalízmu. “Diskusaun hanesan ne’e ita kontinua halo, liuliu iha Timor atu ita hamutuk evita buat ida bolu HOAX. Conselho de Imprensa kontinua enkoraja nomós fó apoiu tuir kapasidade ne’ebé iha atu dezenvolve kapasidade ema iha mundu fotografia atu oinsá sai fotógrafu ida di’ak,” dehan Prezidente CI.
Nia hatutan foto jornalízmu fó hanoin ba ita katak jornalista sira laiha relijiaun no laiha nasaun. “Sé sira (Jornalista) relijiozu, sira hakne’ak hotu reza hotu entaun foto kona-ba ema reza ne’e laiha ona. Sé sira nasionalista hotu ne’ebé bandeira sa’e sira kontinénsia hotu entaun foto ba kontinénsia ne’e laiha,” Virgílio dehan jornalista sira nia relijiaun no nasaun maka sira nia profisaun rasik hanesan jornalista.
Antes ne’e, Conselho de Imprensa serbisu hamutuk ho UNDP ne’ebé hetan fundus hosi povu Japaun, fornese ona formasaun Jornalízmu fotógrafu ba jornalista no estudante komunikasaun sosiál UNTL no UNITAL hosi faze I to’o III.
Alien de formasaun, iha tinan ne’e, iha ámbitu komemorasaun aniversáriu CI ba datoluk, atribui mós prémiu Bernardino Guterres ba kategoria fotógrafu di’ak liu ne’ebé manán hosi fotógrafu Dilma Suzete hosi Grupu Media Nasionál, iha ne’ebé entrega direitamente hosi Prezidente da Repúblika, Francisco Guterres “Lu-Ólo”.
Komemorasaun loron mundiál ba foto, CI serbisu hamutuk ho Komunidade Rede Kreatividade Fotógrafu, hodi realiza workshop ida ho tema “Papél Fotografia iha Rezisténsia no Dezenvolvimentu Timor-Leste”, ne’ebé partisipa hosi jornalista, fotógrafu, ofisiál relasaun publika PNTL no F-FDTL, dirijentes meiu komunikasaun sosiál, estudantes no profesores UNTL no UNITAL, hamutuk na’in 50.