Previous Next

CI Husu Fotógrafu sira Evita Publika Imajen Transmite Sadizmu

Atividade Hare na'in: 83

Díli – Conselho de Imprensa de Timor-Leste (CI), husu ba Jornalista no fotógrafu sira atu Evita publika imajen transmite sadizmu ne’ebé hakanek públiku nia sentimentu.

Diretora Ezekutiva Conselho de Imprensa, Ana Teresa Sequeira hato’o kestaun ne’e iha serimónia komemorasaun loron mundiál ba foto ne’ebé monu iha loron 19 Agostu, iha salaun Otel garden Beach, Praia dos Coqueiros, Díli, kinta-feira (22/08/2019).

“Husu Jornalista no fotógrafu sira atu evita publikasaun liafuan, imajen no lian ne’ebé transmite sadizmu ka violénsia hasoru ema ka balada ne’ebé iha natureza hakanek públiku nia sentimentu,” pedidu Diretora CI ba jornalista no fotógrafu sira.

Diretora CI husu atu jornalista no fotógrafu sira atu kumpre nafatin kódigu étika jornalístika iha artigu 4 ne’ebé ko’alia kona-ba asesu informasaun, dokumentu no imajen sira ho forma legal no professional.

Diretora hato’o mós parabéns ba fotógrafu professional timoroan sira hotu ne’ebé maka fó sira nia-án atu kontribui hodi loke públiku nia asesu ba informasaun liuhosi sira nia obra jornalízmu.

Antes ne’e, Conselho de Imprensa serbisu hamutuk ho UNDP ne’ebé hetan fundus hosi povu Japaun, fornese ona formasaun Jornalízmu fotó ba jornalista no estudante komunikasaun sosiál UNTL no UNITAL hosi faze I to’o III.

Alien de formasaun, iha tinan ne’e, iha ámbitu komemorasaun aniversáriu CI ba datoluk, atribui mós prémiu Bernardino Guterres ba kategoria fotógrafu di’ak liu ne’ebé manán hosi fotógrafu Dilma Suzete hosi Grupu Media Nasionál, iha ne’ebé entrega direitamente hosi Prezidente da Repúblika, Francisco Guterres “Lu-Ólo”.

Komemorasaun loron mundiál ba foto, CI serbisu hamutuk ho Komunidade Rede Kreatividade Fotógrafu, hodi realiza workshop ida ho tema “Papél Fotografia iha Rezisténsia no Dezenvolvimentu Timor-Leste”, ne’ebé partisipa hosi jornalista, fotógrafu, ofisiál relasaun publika PNTL no F-FDTL, dirijentes meiu komunikasaun sosiál, estudantes no profesores UNTL no UNITAL, hamutuk na’in 50.

Imprimir