Previous Next

CI Aprezenta Rezultadu Monitorizasaun Análize Mídia ba Órgaun no Meiu Komunikasaun Sosiál sira

Díli – Conselho de Imprensa de Timor-Leste (CI), hala’o aprezentasaun rezultadu monitorizasaun análize mídia  ba órgaun no meiu komunikasaun sosiál sira, iha salaun enkontru asosiasaun HAK, Faról, Dili, tersa-feira ne’e (30/07/19).

Monitorizasaun análize ba produtu jornalístiku iha meiu komunikasaun sosiál nu’udar parte ida misaun principál Conselho de Imprensa nian atu identifika kualidade notísia sira ne’ebé publika, liuliu notísia sira ne’ebé potensiál ba violasaun kódigu étika jornalístika, prinsípiu universal jornalísmu no lei komunikasaun sosiál.

Prezidente Interinu Conselho de Imprensa, Konselleiru José Maria Ximenes hatete iha tinan ida ne’e mós Conselho de Imprensa kontinua halo monitonizasaun ba produtu jornalístiku sira nune’e bele aprezenta ba mídia hotu hotu.

“Ita sei iha era aprendizajen, ita bele aprende di’ak liutan ho saída maka análize sira halo atu ita bele hadi’a. Tanba kestaun de tempu, jornalista sira dalaruma hakerek notísia mós ho lalais, iha faillansu ruma, tanba ne’e maka, Conselho de Imprensa iha eCIpa ida ne’ebé maka loron loron halo monitorizasaun ba mídia hotuhotu ne’ebé iha,” esplika Prezidente Interinu, Konselleiru, José Maria Ximenes.

Prezidente Interinu mós hato’o agradese wa’in ba mídia sira hotu ne’ebé serbisu hamutuk ona ho Conselho de Imprensa ba dezenvolvimentu nasaun nian liuliu iha seitór komunikasaun sosiál nian. 

Iha aprezentasaun matéria rezultadu análize mídia, Diretór Diresaun Dezenvolvimentu Anáze Mídia, Alberico Junior esplika kona-ba infrasaun sira ne’ebé meiu komunikasaun sosiál sira komete liuhosi publikasaun.

Alberico dehan kanál mídia sira nafatin komete infrasaun hasoru Kódigu Étika Jornalístika no prinsípiu jornalízmu universál.

Iha biban sosializasaun ne’e, Xefe redasaun Online Tafara.tl, Zevonia Vieira hatete jornalista barak maka halo kobertura maibé dalabarak publika fali iha mídia sosiál duke iha mídia sira professional.

Nia mós husu kona-ba esforsu saída Conselho de Imprensa nian atu hala’o serbisu hamutuk ho Sekret’ariu Estadu ba Igualdade Jéneru nomós asosiasaun sira ne’ebe tau matan ba feto hodi bele kapasita jornalista sira iha reportajen ba Sensível Jéneru.

“Sé ita laiha sensitive ba editor club no organizasaun feto sira atu hare ba isu jénder. Tanba dalaruma rede feto rasik ko’alia ba mídia, feto sempre sai tarjetu entaun jornalista mós uja sira nia kuota ne’e sai hanesan nia notísia,” dehan Zevonia.

Fotografer Jornal Timor-Post, Acacio Pinto hatete, durante ejistensia CI to’o agora halo ona monitorizasaun hatudu katak laiha mudansa ba produtu jornalístika iha meiu komunikasaun sosiál sira.

Nia parte sujere ba CI atu labele hala’o de’it sosializasaun maibé bele bolu direta mídia ho jornalista sira atu bele ba hatan iha Conselho de Imprensa nune’e labele hamosu tan eru hanesan iha futuru.

“hanesan jornalista, ami sente triste, ami labele korije ami nia an bainhira ami la hetan xamada ida direita hosi ami nia redasaun no Conselho de Imprensa,” levanta Acacio Pinto.

Hatan ba kestaun sira ne’e, Prezidente Interinu Conselho de Imprensa hatete persiza diskuti hodi hadia infrasaun tuir kódigu étika journalizmu.

“Ita presiza tur hamutuk hodi diskuti saída mak di’ak, ita presiza fó hanoin ba malu tanba buat ne’ebé e CI análize mídia hetan hanesan lisaun ba ita hotu, ita presiza hadi’a kedan infrasaun sira hasoru kódigu étika,” dehan Konselleiru Jose.

Konselleiru ne’e mós dehan Conselho de Imprensa nia ejisténsia la’ós atu fo presaun ba mídia ka jornalista sira maibé hanesan atu fó hanoin ba malu de’it atu bele hadi’a nafatin produtu jornalístiku sira.

Sosializasaun ne’e, partisipa hosi editor, xefe redasaun no jornalista sira hosi órgaun no meiu komunikasaun sosiál sira, iha Kapitál Dili.

 





Imprimir   Email