Díli – Conselho de Imprensa de Timor-Leste (CI), Tersa-feira (16/7), liuhosi enkontru kortezia ho Eis Prezidente Republika nomos nu’udar Laureadu Nobel da Pas, José Ramos Horta hodi husu ideias balun kona-ba inisiativa CI nian atu difini loron nasionál liberdade imprensa.
Iha enkontru ne’e, Horta fó apoiu tomak ba vontade hosi Conselho de Imprensa atu bele deside loron ida hodi konsidera nu’udar loron nasionál liberdade imprensa.
“Ohin ha’u ko’alia ho kolega sira Conselho de Imprensa, husu ha’u nia apoiu, ha’u nia tulun ba loron nasionál liberdade imprensa, klaru ha’u apoiu 100% (Sen pursentu)”
Horta laiha referénsia ba loron ruma atu determina nu’udar loron nasionál liberdade imprensa maibé nia husu ba CI atu bele difini loron ida hodi konsidera nu’udar loron nasionál liberdade imprensa.
Entretantu, Prezidente CI, Virgílio da Silva Guterres, konsidera José Ramos Horta nu’udar figura ida importante hanesan eis Jornalista no Laureadu Nobel da Pas, hodi husu hanoin ruma kona-ba difini loron nasionál liberdade imprensa.
Virgílio esplika, iha referénsia lubuk ida maka CI ho mídia na’in, jornalista no asosiasaun jornalista sira diskute hamutuk ona hanesan 16 Outubru, jornalista na’in lima mate iha Balibó.
Vigura númeru primeiru iha CI ne’e esforsu atu molok mandatu remata iha fulan Maiu tinan 2020, bele hatama ona proposta ida ba Governu hodi hetan aprovasaun ba loron nasionál liberdade imprensa.
Antes ne’e, CI hala’o ona enkontru dala rua hamutuk ho mídia na’in, jornalista no asosiasaun jornalista sira hodi rona mós sira nia sujestaun no preokupasaun sira. (CI)