Atividade

Conselho de Imprensa Ko’alia iha Semináriu AJTL “Jornalízmu, Lei no Direitu iha Funu”

Dili, 9/7/2019 – Membru Conselho de Imprensa de Timor-Leste (CI), Konselleiru, Francisco B. S. da Costa, ofisialmente loke Semináriu kona-ba “Jornalízmu, Lei no Direitu Iha Funu,” ne’ebé organiza hosi Asosiasaun Jornalista Timor Lorosa’e (AJTL) no Komité Internasionál Cruz Vermelha (ICRC), iha salaun konferénsia JL. Villa, 5/7/2019.

Konselleiru Francisco, iha nia intervensaun loke semináriu ne’e hatete katak, “buat ne’ebé Conselho de Imprensa nia hanoin mak, serimónia, semináriu no kolókiu sira hanesan ne’e, importante tebes atu ita bele aproveita, ita bele manán esperiénsia hosi kolega sira hosi Indonézia, peritu-peritu sira ne’ebé ICRC fasilita ho mós AJTL fasilita,  importante ba ita atu bele aprende ho sira liuliu sobre oinsá jornalista sira tama iha situasaun konflitu”.

Iha biban hanesan, Prezidente AJTL, David Hugo, hato’o sobre esforsu AJTL iha apoiu jornalista sira iha aumenta koñesimentu ba mundu jornalízmu.

“AJTL hare ida ne’e importante, oinsá maka ita bele hatene métodu sira ne’ebé maka ita bele utiliza iha area konflitu sira, hanesan lisaun ida hosi AJTL, oinsá atu kapasita Jornalista- jornalista sira, fó advokasia ba jornalista sira, hasa’e jornalista sira nia koñesimentu iha área oioin, liu hosi semináriu, liu hosi formasaun sira hanesan ne’e maka bele aumenta ida-idak nia kapasidade atu hatene liután parte sira ne’ebé mak seidauk iha esperiénsia, bele foti hodi sai bukae ba servisu loro-loron ninian,” akresenta David Hugo.

ICRC Communication Coordinator, Indonesia and Timor-Leste, Fitri Adi Anugrah, iha nia intervensaun mós hato’o katak, “Semináriu ne’e ho objetivu, atu fó koñesimentu internasionál humanitarian law relasiona ho jornalízmu iha situasaun konflitu”.

Partisipantes iha treinamentu ne’e maka Jornalista Rádiu Komunidade mai hosi Munisípiu 12 no Rejiaun Espesiál Oecussi, Jornalista hosi Mídia online, jornál, rádiu no televizaun iha Dili laran, inklui Xefe Unidade Produsaun no Mídia CI, Maria Bibel no Tékniku Profisionál Produsaun no Mídia CI, Prizaldo Almeida.