Conselho de Imprensa Formaliza Kooperasaun ho The National Press Council of Thailand

Bangkok, 8/6 – Conselho de Imprensa de Timor-Leste (CI) ho the National Press Council of Thailand (NPCT) asina nota kooperasaun atu promove étika jornalizmu no mós atu hametin relasaun mídia nian entre nasaun rua. Haktuir ba enkontru konjuntu entre CI no NPCT iha Bangkok loron 7 fulan Juñu 2019, CI no NPCT konkorda ona atu formaliza inisiativa ne’e iha MoU ida hodi kompromete sira nia-an atu promove no hametin ambiente livre no asegura asesu ba informasaun ne’ebé korretu no la bias hodi apoiu ba governsaun di’ak no interese públiku. 

Prezidente Conselho de Imprensa iha enkontru ho estrutura the National Press Council of Thailand dehan katak laiha barreira iha servisu jornalizmu. “Maski polítikamente Timor-Leste esforsu maka’as hela atu sai membru ASEAN, maibé hau hanoin iha mídia, Komponente esensiál hosi dezenvolvimentu mak ita laiha limitasaun polítika tanba ita iha interese komún kona-ba demokrasia no liberdade imprensa,” dehan Prezidente Virgílio da Silva Guterres hodi enfaze kona-ba inisiativa atu harii rede Conselho de Imprensa iha rejiaun Sudeste Aziátiku. 

Komprensaun mutual ne’e hatún duni iha nota kooperasaun ida ne’ebé asina hosi Prezidente CI, Virgílio da Silva Guterres ho Chairperson of the National Press Council of Thailand, Chavarong Limpattamapanee iha Bangkok, loron 8 fulan Juñu. Instituisaun rua ne’e tau kompromisu iha kooperasaun ne’e mak atu promove étika jornalizmu iha rejiaun ASEAN. Instituisaun rua ne’e konkorda atu hahú hala’o atividades sira hanesan lidera rede organizasaun imprensa ho halo mapamentu ba oportunidade no dezafiu hodi estabelese conselho de imprensa iha nasaun membru ASEAN inklui Timor-Leste; organiza atividades hanesan enkontru entre Conselho de Imprensa sira ne’ebé eziste ona iha nasaun membru ASEAN inklui Timor-Leste; no mós organiza programa interkambiu kona-ba étika jornalizmu.

Nu’udar asaun konkretu ida hosi implementasaun nota kooperasaun ne’e mak the National Press Council of Thailand konvida Conselho de Imprensa atu hasoru malu ho Press Council of Myanmar no Dewan Pers Indonesia iha tinan ida ne’e nia laran atu hodi esplora ideas kona-ba rede ne’ebé mak sei fasilita servisu jornalizmu iha rejiaun Sudeste Aziátiku ne’e. 

Iha tinan ida ne’e nia laran Conselho de Imprensa asina ona nota kooperasaun ho Dewan Pers Indonesia iha fulan Marsu no ho the National Press Council of Thailand iha fulan Juñu ne’e. Desde mandatu dahuluk membru Conselho de Imprensa nian, estrutura vizita no hetan vizita hodi realiza enkontru kortejia ho Press Council of Australia, Press Council of New Zealand, Dewan Pers Indonesia no ikus liu mak National Press Council of Thailand.


Imprimir   Email