CI no UNDP Entrega Sertifikadu ba Partisipantes Treinamentu Journalizmu Komprensivu

CI no UNDP Entrega Sertifikadu ba Partisipantes Treinamentu Journalizmu Komprensivu

Atividade Hare nain: 4333

Dili, Conselho de Imprensa de Timor-Leste (CI) no ajénsia ONU nian, the United Nations Development Programe (UNDP Timor-Leste), entrega sertifikadu ba jornalista 25 ne’ebé tuir treinamentu Journalizmu Komprensivu, iha Timor Plaza, quarta-feira (29/05/2019).

Representante partisipantes, Cidalia Antoninha, rekoñese katak, sira aprende buat barak hosi treinamentu ne’e, “matéria sira ne’e, hanorin tebes ami, atu nune’e bele serbisu iha mídia imprime, online no mós mídia eletrónika,”esplika Cidalia Antoninha.

Iha fatin hanesan, Reprezentantes ida, Armando Alves, agradese ba CI, UNDP no ba Povu Japaun liu hosi Embaixada Japaun,“hau lori maluk 25 nia naran, kompostu hosi mane 13 no feto 12, iha biban ida ne’e ami agradese wa’in ba treinamentu ne’ebé ami tuir.”
Nia mós husu ba UNDP no CI ba futuru nafatin hametin liu tan programa ida ne’e, atu nune’e bele fó fini jornalista ba rai ida ne’e. 

Prezidente Conselho de Imprensa de Timor-Leste (CI), Virgílio da Silva Guterres, hateten, kontente nafatin hare prosesu formasaun ida kompletu, ho ema nain 25 ho reprezentasaun entre feto ho mane ne’ebé balansu. 

Prezidente Conselho de Imprensa de Timor-Leste (CI), mós husu ba partisipantes sira atu utiliza no hakerek  informasaun ka notísia ho los no hare e lee molok publika, “hahú servisu ho kuidadu iha utilizasaun liafuan, se iha májika Celine Dion dehan The Power of Love, ita mós tenke hatene The Power of Languets, Jornalizmu ne’e nia servisu, liafuan ne’e mak nia podér, kuandu utiliza sala, buat ne’e sai sala.”

UNDP Resident Representative, Robert Juhkam, impoint parte tolu importante iha nia diskursu maka mídia nia forma ona arte ida importante tebes ba iha instituisaun hotu. Asegura efikás, akontabilidade no transparénsia.  Envolvimentu mídia iha foti informasaun hosi area remotas.

“Mídia forma ona parte ida ne’ebé importante tebes, mídia sai hanesan fatin atu ema publika informasaun no sai mós fatin ba debate públiku ,” dehan UNDP Resident Representative.

Reprezentante Embaixadór Japaun, Misato Taki, agrandese ba parseiru sira ne’ebé realiza ona treinamentu ne’e. 

Misato Taki mós aumenta katak, mídia nia papél importante iha asegura transparénsia no akontabilidade. Nia fo hanoin mós ba jornalista sira atu hato’o informasaun tenke akurasia ka informasaun labele sala.