Jornalista veteranu Adelino Gomes, sente “onradu” no “orgullu” ho esforsu no desizaun Conselho de Imprensa Timor-Leste (KI-sigla tetun) ne’ebé hili nia naran ba prémiu KI nian iha kategoria reportajen jornalistika iha lian Portugés di’ak liu.
“Onra boot mai ha’u tanba KI konsidera ha’u nia naran ba iha prémiu KI nian”, hateten Adelino Gomes, ohin, bainhira halo enkontru ho Prezidente KI, Virgilio da Silva Guterres ho membru KI sira iha salaun Plenária KI, Quintal Boot, Dili.
Jornalista veteranu ne’e dezafia jornalista timoroan sira atu bele kompete ba oportunidade prémiu ne’e no nia promete sei lori livru mai entrega ba KI kona-ba reportajen jornalistiku iha lian Portugés, atu bele sai referénsia ba jornalista timoroan hakerek iha lian Portugés.
Adelino Gomes, moris iha Marrazes, 10 Agustus 1944, jornalista Portugeza ida, ne’ebé halo kobertura iha Revolução dos Cravos, no nu’udar kolaborator importante hosi jornalista Horst Hano, ARD durante tempu ne’ebé nia mosu iha Portugal iha tinan 1974-1976.
Adelino Gomes servisu nu’udar reporter RTP iha tinan 1975, periodu difisil liuhosi revolusaun ne’e, hodi kobre akontesimentu 11 Marsu 1975, inísiu funu sivíl iha Angola no funu sivíl iha Timor.
Ba Timor -Leste nia prosesu luta, Adelino Gomes, halo kobertura ba situasaun difisil Timor-Leste nian iha 1975 no konsege transmite entrevista ho Saudozu Nicolau Lobato iha Palásiu Governu antes invazaun Indonézia iha 7 Dezembru 21975.
Ho nia obra jornalistika ne’ebé Adelino Gomes halo ba Timor-Leste nia prosesu luta nu’udar razaun forte ba KI hodi deside no nomeia Adelino Gomes nia naran ba kategoria prémiu obra jornalistiku iha lian portugés di’ak liu.
Iha ámbitu forum internasionál Dili Dialogue Forum (DDF), 10 Maiu 2018, Prezidente Repúblika, Taur Matan Ruak, atuál Primeiru-Ministru, halo lansamentu ba prémiu KI ho kategoria lima (5), kompostu hosi Adelino Gomes, ba kategoria reportajen Jornalistika iha lian Portugés di’ak liu, prémiu Francisco Borja da Costa, ba Kategoria Jornalista ne’ebé halo reportajen Jornalistiku ba asuntu interese umanu di’ak liu (mídia imprime ho online), prémiu Greg Shackleton ba Kategoria Jornalista ne’ebé halo reportajen Jornalistiku ba asuntu interese umanu di’ak liu (media eletrónika, Radio no Televizaun), prémiu Bernardino Guterres ba Kategoria Fotografia di’ak liu ho prémiu KI ba kategoria media ne’ebé fó espasu barak liu ba notísia internal no tratamentu di’ak liu ba Jornalista nia bem star.
KI nu’udar entidade reguladora, órgaun meius komunikasaun sosiál iha Timor-Leste ho natureza hanesan entidade administrativa independente, hetan autonomia administrativa, finanseira no iha patrimóniu rasik, no define ho independénsia kona-ba orientasaun ba ninia atividade sira sein sujeita ba kualkér diretriz ka orientasaun hosi podér polítiku. (CI)