Díli – Conselho de Imprensa de Timor-Leste (CI) hamutuk ho Ajénsia Programa Nasoens Unidas ba Dezenvolvimentu (PNUD/UNDP), ho susesu realiza
ona Treinamentu Jornalízmu Kompriénsivu ba Munisípiu 12.
Programa ne’e realiza iha meadu fulan Fevereiru no Marsu tinan 2019, involve partisipantes hosi munisípiu 12 mak hanesan Lautem, Baucau, Viqueque, Manatuto, Aileu, Ainaro Manufahi, Ermera, Liquica, Covalima no Dili.
Atividade kapasitasaun ne’e hetan partisipasaun máximu hosi Jornalista Rádiu Komunidade, Korespondente Mídia Nasionál, Ofisiál Mídia Instituisaun Estadu iha Munisípiu sira, reprezentante Autoridade Lokal balun, Juventude nomos estudante sekundária balun.
Iha serimónia abertura Treinamentu Jornalízmu Kompriénsivu parte leste nian, Konselleiru José Maria Ximenes, hatete jornalista sira presiza kapasita-án bebeik atu aprofunda liu tan kapasidade tamba iha materia balun foun maske materia balun aprende ona maibé bele aprofunda liu tan.
“Tamba ne’e liu husi Conselho de Imprensa ha’u hakarak agradese nafatin tamba ita bele realiza treinamentu ida ne’ebé nia métudu ne’e jornalizmu Komrpiénsivu, katak buka meius atu komprende saída mak ita atu halo, nune’e mós Kódigu Étika Jornalístika,” dehan konselleiru José Maria Ximenes.
Entretantu Manajer Projetu Learn-UNDP, Tito Filipe esplika sira sente kontente bainhira halo parseiru ho Conselho de Imprensa, atu fó kapasitasaun ba jornalista sira iha Timor laran tomak.
“Ohin loron ami kontente tamba bele habelar formasaun ne’e to’o iha Munisípiu, oinsá bele envolve rádiu komunidade sira, no korespondente mídia imprimi nomós ajente ofisiál relasaun públika,” akresenta Tito Filipe.
Treinamentu iha parte leste ne’ebé realiza iha Baucau no partisipa mós hosi munisípiu Lautem, Viqueque no Manatuto, durante loron lima hahu hosi 25 Fevereiru to’o 01 Marsu 2019, total partisipantes hamutuk ema na’in 30, feto 10 no mane 20.
Treinamentu hanesan realiza mós iha parte rai klaran (Maubissi), partisipa hosi rádiu komunidade (Aileu, Maubissi, Manufahi, Ainaro no Covalima), korespondente mídia sira, reprezentante autoridade lokál balun iha Maubisi, estudante sekundáriu Maubissi nomós reprezentante futuru rádiu komunidadeTuriskai.
Partisipantes treinamentu apresia tebes ho formasaun ne’ebé fasilata hosi CI no UNDP no hetan apoiu fundus hosi povu Japaun, tanba liuhosi treinamentu refere sira bele apriénde materia sira mesak importante tebes.
Reprezentante Rádiu Komunidade Kovataroman Suai, Mariano Soares kontente tanba bele hetan formasaun hosi CI no UNDP.
“Ha’u sente kontente tebes tanba materia sira ne’ebé ami simu, importante tebes atu ajuda ami nia serbisu iha ami nia munisípiu idak-idak,” dehan Mariano.
Entretantu Jestór Radiu Komunidade Dom Boa Ventura, Manufahi, Vasco da Costa Mendes mós espresa sentimentu alegria tanba CI no UNDP bele lori ona formasaun sira ba iha rejiaun liu-liu ba rádiu komunidade sira.
“Durante loron rua ne’e, ami apriende buat lubuk ida liu-liu kona-ba oinsá maka foti imajén ne’ebé di’ak, oinsá foti dadus nomós maneira ida ho kretivu hodi entrevista ita nia fontes sira,” esplika Vasco.
Durante treinamentu iha parte rai klaran ne’ebé realiza iha salaun paroquia Maubissi, hetan partisipasaun mós hosi Peskizadora Antropolojista hosi Universidade Reinu Unidu (Englatera), Laura Francis Burke.
Laura sente orgullu tebes ho formasaun ne’ebé fasilita hosi Conselho Imprensa no UNDP. Tanba nia mós apriende materia lubuk ne’ebé foun tebes ba nia esperiénsia.
“Ha’u kontente tebes observa modulu kona-ba étika ne’ebé importante tebes, nomós kona-ba data jornalízmu. Ha’u mai timor hanesan peskizadora entaun ha’u nia serbisu besik ho jornalízmu oituan,” Laura hare katak partisipantes sira foku duni ba formasaun ne’e hodi apriende di’ak liutan.
Iha serimónia enseramentu Treinamentu Jornalízmu Kompriénsivu, iha Munisípiu Liquiça, Konselleiru Paulo Adriano da Cruz Araujo, hato’o agradese wa’in ba UNDP nomós povu Japaun ne’ebé bele ajuda ona jornalista Timoroan sira hodi eleva sira nia koñesimentu iha mundu jornalízmu ninian.
“Agradese espesiál ba povu japaun ne’ebé fó apoiu bele realiza Treinamentu Jornalízmu Kompriénsivu,” dehan Konselleiru Paulo.
Maske susesu ona formasaun iha munisípiu 12, Conselho de Imprensa kontinua husu ba UNDP atu bele fornese mós treinamentu hanesan iha Reziaun Administrativa Espesiál Oecusse Ambeno (RAEO) nune’e bele kompleta tiha treinamentu ne’ebé hanesan ba teritóriu tomak.
Treinamentu ne’e hanesan parte ida oinsá CI no UNDP hahú halo desentralizasaun formasaun jornalizmu ba rejiaun no munisípiu sira tuir planu ne’ebé iha.
Iha enseramentu loron ikus Treinamentu Jornalízmu Kompriénsivu iha Munisípiu Liquiça, Espesialista Komunikasaun Sosiál, UNDP, Yuichi Ishida hato’o agradese wa’in ba partisipantes sira hotu tanba treinamentu refere susesu tebes.
“Ha’u kontente loos tanba hare ita nia motivasaun atu apriénde kona-ba siénsia téknika foun,” esplika Yuichi.
Treinamentu Jornalízmu Kompriénsivu parte leste hahú hosi loron 25 Fevereiru to’o 01 Marsu 2019. Parte rai klara hahú husi loron 25-27 Marsu no parte loron monu hahú hosi 28-29 Marsu 2019.
Partisipantes Treinamentu Jornalízmu Kompriénsivu husi munisípiu 12 hamutuk ema na’in 86 no tuir planu, Conselho de Imprensa no UNDP sei fasilita mós formasaun hanesan iha Reziaun Administrativa Espesiál Oecusse Ambeno (RAEO). (CI)