Dili – Conselho de Imprensa de Timor-Leste (CI) kompostu hosi Prezidente CI, hala’o audénsia ho Prezidente Repúblika, Sesta-Feira, loron 12 Abril 2019, iha Palásiu Prezidensiál, Aitarak Laran, Dili.
Objetivu hosi audénsia ne’e maka, Conselho de Imprensa konvida ofisialmente Xefe Estadu, Francisco Guterres “Lú-Olo” atu ensera eventu anuál Dili Dialogue Forum (DDF) ne’ebé sei realiza iha loron 8-10 Maiu 2019.
Ekipa Conselho de Imprensa iha enkontru ho Xefe Estadu kompostu hosi Prezidente CI, Virgílio da Silva Guterres, Konselleiru Francisco Simões Belo da Costa, Diretora Ezekutiva, Ana Teresa Sequeira, Asesór Planu no Finansas, Rigoberto Monteiro no Afisiál Gabinete Prezidente, Angelina Gusmão.
Prezidente Repúblika, Francisco Guterres “Lú-Olo”, simu pedidu Conselho de Imprensa nian, konfirma katak Xefe Estadu sei partisipa no hato’o mós mensajén hodi ensera atividade Dili Dialogue Forum.
Depois audénsia ho Xefe Estadu, iha entrevista ho Mídia sira, Prezidente CI, Virgílio da Silva Guterres hatete iha tinan kotuk, Prezidente Repúblika lakonsege marka prezensa iha eventu anuál DDF, nune’e ba tinan ida ne’e, Xefe Estadu sei hola parte iha eventu refere.
“Ami konvida Prezidente Repúblika atu ba serimónia enseramentu Dili Dialogue Forum tinan ida ne’e nian ne’eb’e hala’o iha fulan Maiu loron 9 to’o 10. Ami nia karta haruka tiha ona mai Prezidente da Repúblika no ohin mai hanesan ofisialmente konvida tan Prezidente da Repúblika,” Dehan Prezidente CI.
Dili Dialogue Forum hanesan eventu anuál ne’ebé tinan-tinan Conselho de Imprensa realiza no konvida mós reprezentante órgaun reguladór sira hosi nasaun sira iha Suduéste Aziátiku no pásífiku.
Semináriu Internasionál Díli Dialogue Forum realiza iha ámbitu komemorasaun aniversáriu Conselho de Imprensa nian kada tinan-tinan. (CI)