Díli – Prezidente Conselho de Imprensa de Timor-Leste (CI), Virgílio da Silva Guterres, akompaña husi estrutura ezekutiva CI hala, hala’o diskusaun ho Prezidente Komisaun Funsaun Públika (KFP), Faustinho Cardoso, kona-ba estatutu funsionáriu CI nian prosesu tranferénsia funsionáriu públiku balun mai CI.
Diskusaun ne’e realiza iha Gabinete Prezidente KFP, Tersa-Feira (09/04). Hola parte mós iha diskusaun ne’e, Diretora Ezekutiva, Ana Teresa Sequeira, Diretora Rekursu Umanu, Lígia Vieira do Amaral, Diretór Diresaun Komunikasaun Sosiál, Relasaun Institusionál no Kooperasaun (DCSRIC), Altino da Cruz Freitas nomós Asesór Planu no Finansas, Rigoberto Monteiro. Ekipa KFP, Prezidente KFP, Faustinho Cardoso ho Gabinete.
Hare ba rekursu umanu iha Conselho de Imprensa ne’ebé menus tebes, maka CI husu ba Komisaun Funsaun Públika atu hala’o mós tranferénsia funsionáriu públiku balun hosi RTTL,EP ba CI hodi bele apoiu ba atividade sira CI nian.
Iha parte seluk, hare ba mandatu Conselho de Imprensa nian besik tinan tolu (3), Maka CI hato’o mós pedidu ba Komisaun Funsaun Públika atu bele hala’o prosesu tranferénsia funsionáriu Ajente Administrativu iha CI atu sai hanesan funsionáriu públiku no permanente iha Conselho de Imprensa.
Pedidu rua refere sei lao tuir nia prosesu tanba Conselho de Imprensa rasik seidauk preve orsamentu 25 % ba funsionariu publiku hirak ne’e iha planu Orsamentu Jerál Estadu ba CI nian iha tinan 2019.
Entretantu relasiona ho prosesu tranferénsia funsionáriu Ajente Administrativa CI nian sai funsionáriu Públiku labele realiza tanba lei la fó dalan. Prezidente Komisaun funsaun públiku husu atu CI karik harak atu lori funsionáriu sira atu sai funsionáriu Públiku maka tenke tuir rekrutamentu ne’ebé vigor ona iha lei Funsaun Públiku ninian.
Conselho de Imprensa de Timor-Leste (CI), hari’I iha loron 10 Maiu 2016. Oras ne’e dadaun CI tama ona ba mandatu tinan datoluk, no funsionáriu sira hamutuk na’in 34. Membru na’in lima (5), Asesór ida (1), Tékniku Profesionál 34 no asistente tékniku na’in haat (4).