Kuala Lumpur, 31/03 – Jornalista sira, dalaruma hola parte iha violénsia polítika no ideolojia ne’ebé lansa hosi Governu, líder polítiku ka grupu ruma ne’ebé kauza ema sivil sira mate, estraga isin lolon no hamosu trauma ne’ebé maka’as. Atu ajuda jornalista sira halo reportajen ho imparsiál, justu no rigór, UNESCO apoiu Public Media Alliance (PMA), Asian Pacific Broadcasting (ABU) no Ethical Journalism Network (EJN), lori ona reprezentante sira hosi Timor-Leste, Indonézia, Malaysia, Filipina no Thailandia hodi dezenvolve matadalan ida ba reportajen diskursu de ódiu no terorizmu.
“Ita labele haluha katak jornalista halo papél importante atu harii komunidade ida, atu haforsa individu ida no atu halo asaun violénsia ida sai boot. Jornalista sira lakon ida ne’e iha sira nia servisu bainhira halo reportajen ba kazu Christchurch, Nova Zelandia foin lalais ne’e,” dehan oradór prinsipál Dr. Chandra Muzaffar, Prezidente Internatinál Movement for a Just World.
Iha nasaun sira hanesan Brasil, Cina, Hongaria, India no Turki, lideransa sira forma komunidade hodi kontra komunidade, forma maioria kontra minoria. “Tan ne’e jornalista tenki kuidadu atu labele sai plataforma ba Governu ka líder sira atu uza jornalista ba sira nia interese ne’ebé la fó benefísiu ba ema sivil sira,” hatutan Dr. Chandra, ema ida ne’ebé servisu atu krítika injustisa globál no hamosu gia ba vizaun sivilizasaun alternativa ne’ebé justa ho valores espirituais no morál universál.
Iha semináriu traballu loron tolu ne’e, dezde dia 29 to’o 31 Marsu, jornalista sira no reprezentante sira hosi organizasaun mídia nian inklui Conselho de Imprensa simu informasaun no ezemplu kazu sira atu ajuda sira kompende didi’ak kontestu nasaun no rejionál, papél jornalista nian nomós kode konduta ne’ebé rekere jornalista sira atu servisu ho imparsíal, justu no rigór. Konseitu sira ne’e ajuda ekipa traballu ne’e atu produs matadalan ida ne’ebé sei uza iha nível rejiaun Sudueste Aziátiku no Pasífiku.
Ezemplu kazu sira hanesan diskursu de ódiu ne’ebé lansa hosi Prezidente Filipina ne’ebé hamate ona alegadu droga hamutuk ema 2,300; kazu Rohingya ne’ebé hamosu vítima ema sivil kuaze 700.000 sai mós lisaun ba jornalista sira hodi tetu no tau hamutuk pontu sira iha matadalan ne’e.
Fasilitador Dr. Zahera Harb hosi EJN nomós Pipope Panitchpakdi hosi Thailand Public Broadcasting Service, durante prosesu dezenvolve matadalan ne’e to’o remata ajuda ona ekipa traballu produs esbosu matadalan 3 ba reportajen diskursu de ódiu, reportajen terorizmu no reportajen violénsia. Matadalan ne’e define didi’ak saída mak diskursu de ódiu, terorizmu nomós violénsia no mai ho pontu importante sira ne’ebé atu gia jornalista sira iha halo reportajen ba asuntu sira ne’e.
Deskreve didi’ak kode konduta iha asaun sai nu’udar pontu sira ne’ebé fó atensaun didi’ak iha matadalan ne’e inklui mantein valór jornalistiku, utilizasaun lingua nomós evita sai plataforma ba sira ne’ebé haboot no glorifika violénsia ba sira nia ideolojia polítika. Esbosu matadalan ne’e sei tama ba revizaun final no sei sai matadalan ida atu bele kontribui ba hamentin trankuilidade no pas iha nasaun ididak no jeralmente iha Sudeste Azíatiku no Pasífiku.