CI Partilla Informasaun ho Embaixadór TL ba RI

Delegasaun Conselho de Imprensa de Timor-Leste (CI) ne’ebé lidera rasik husi Prezidente CI, Virgílio da Silva Guterres, Kinta (14/3/2019), hala’o vizita ba Embaixada Timor-Leste ba Indonézia hodi halo audiénsia ho Embaixadór Carlos Alberto Xavier Perreira.

Delegasaun CI nian kompostu husi, Konselleiru José Ximenes, Paulo Araújo, Francisco Belo Simões da Costa, no mós Asesór Programátiku CI nian, Rigoberto Monteiro, halo audiénsia ho Embaxadór Carlos Alberto Xavier Pereira ne’e akompaña mós husi Konsulár Marcos da Costa. 

Objetivu husi vizita ba delegasaun CI nian ba Embaixada TL nian iha Mayapada Tower, enderesu Jenerál Sudirman Jakarta, hodi fó koñesimentu ba Embaixadór kona-ba prezensa delegasaun CI nian iha Jakarta no mós partilla informasaun preliminariu balun  ba Embaixadór kona-ba atividade serbisu CI nian durante estadia iha Jakarta.

Embaixadór Carlos Alberto Xavier Pereira, simu  delegasaun CI nian ho ksolok tebes no fó nia apoiu tomak ba CI atu halo atividade iha Jakarta, liuliu kria lasu amizade no kooperasaun ho instituisaun sira relevánsia nian iha Jakarta atu bele fortifika malu iha dezenvolvimentu institusionál no dezenvolvimentu rekursu umanus.

“Ha’u nia benvindu mai iha Jakarta no espera imi nia atividade  programmatic sira ne’ebé atu hala’o iha Jakarta susesu ba ita hotu nia interese no Estadu Timor-Leste nia hakarak,” hateten Embaixadór Carlos Alberto, bainhira hahú audiénsia ho delegasaun CI. 

Embaixadór Carlos Alberto sujere ba CI atu hala’o knar Estadu nian ne’e ho másimu tuir mandamentu CI nian, atu oinsá mak bele eleva di’ak liu tan koñesimentu no abilidade jornalista timoroan sira nian.

“Ita nia media no ita nia jornalista sira nia serbisu sei dook tebes husi ita nia povu no públiku espetativa atu hala’o nia knar ida profisionál nudár meius ida kontrolu sosiál no haklaken informasaun ho rigor no objetivade. Espera CI bele serbisu fo espasu liu tan ba eleva koñesimentu ita jornalista Timoroan sira iha Timor,” hateten Embaixadór Carlos Alberto.

Biban ne’e ,Prezidente CI, Virgílio da Silva Guterres, informa datalhamenta programa serbisu CI nian durante loron hirak ne’e nia laran, hahú husi loron 12 to’o mai loron 15 fulan Marsu tinan 2019.

Programa serbisu CI nian durante estadia iha Jakarta, mak asina ona  nota entendimentu ho Pusat Mediasi Nasional (PMN) Indonézia, ho objetivu ba kapasitasaun funsionáriu CI nian iha área mediasaun.

CI mós halo ona inísiu diskusaun ho Komisi Penyeiaran Indonézia (KPI) atu bele iha akordu kooperasaun institusionál ne’ebé tuir planu sei selebra asinatura kooperasaun ne’e iha loron 1 fulan Abril tinan 2019 iha Banjarmasin-Indonézia.


Imprimir   Email