CI-UNDP Entrega Sertifikadu ba Partisipante Treinamentu Journalizmu Kompriensivu iha Rejiaun Leste

BAUCAU, 01/03 - Conselho de Imprensa de Timor-Leste (CI) hamutuk ho Agensia Nasoens Unidas ba Programa Dezenvolvimentu (UNDP) entrega sertifikadu ba partisipante sira hamutuk na’in 30 ne’ebé kompostu hosi feto 11 no mane 19.

Serímonia entrega sertifikadu ne’e realiza hafoin formasaun loron lima kona-ba Treinamentu Jornalizmu Kompriensivu ba Jornalista Rádiu Komunidade, korespondente sira kanál mídia seluk nian nomós pesoál sira relasaun públiku instituisaun relevante seluk, inklui reprezentante sira Juventude balun iha Munisípiu Baucau. 

Treinamentu ne’e ho tema, “Hametin Jornalista sira nia kompeténsia liu-hosi treinamentu Jornalizmu Kompriensivu iha Rejiaun Leste”. Atividade kapasitasaun ne’e hala’o iha Uma Dame, Munisípiu Baucau, durante loron lima, hahu loron 25 fulan Fevreiru tinan ne’e.

bele hare mós https://www.conselhoimprensa.tl/tl/eventu/atividade/419-prezidente-ci-fahe-esprensia-ba-jornalista-radiu-komunidade

Antes fahe sertifikadu, Analisis Comunication UNDP Timor-Leste, Yuichi Ishida hatete, Conselho de Imprensa hamutuk ho UNDP, sente orgulhu ho partispante sira tamba hakarak aprende tekniku balun ne’ebe oferese hosi treinador sira.

“Ha’u hanoin semana ida la sufisiente atu halo treinamentu ida ne’e maibe aproveita no estuda rasik hodi aumenta kapasidade ne’ebe durante ne’e imi iha ona, tamba Komponente foto ida ita bele uja fali iha tinan 20 mai, nomós Video inklui hakerek artigu, tamba ne’e ita tenki aprende lor-loron,” nia dehan.

Nune’e mós Diretur Diresaun Analiza Midia (DDAM), Alberico da Costa Junior nia hare, durante loron lima nia parte sente partisipante sira diferente tebes ho kolega sira ne’ebe ke iha Nasional.

“Tamba durante loron lima nia laran espiritu atu estuda ne’e luar biasa (extraordinário), ida ne’e ha’u hanoin buat ne’ebe ke mai ami ne’e apresiasaun bo’ot ida mos”, nia esplika.

Diretur ne’e mos fo hela mensajen ba partisipantes sira atu kuntinua pratika materia ne’eb’e sira simu durante treinamentu tamba teoria kuandu la kontinua tau iha pratika nia parte hanoin difisil atu lao ba oin. Alem de ne’e atu fo sai notisia ida tenki halo uluk ferifikasaun.

“ Ba jornalista sira, importante ba ita mak ne’e ferifikasaun ne’e mak bele fo diferensia entre  jourrnalizmu ho propaganda, ha’u hanoin ida ne’e importante ba ita, I tenki halo ita nia papel ho diak, labele halo notisia ba politiku sira deit maibe diak liu ita koko oinsa para atu promove sai lian ba ema ne’ebe ke kbi’it laek sira, duke ba politiku nain sira”, nia hameno.

Iha fatin hanesan, Partisipante hosi Instituisaun PNTL, Auxiliadora da Costa Freitas, agradese ba Conselho de Imprensa (CI) no parseiru UNDP, inklui formadores sira tamba treinamento ne’e bele aumenta sira nia koñesimentu maske sira laos jornalista.

hare móshttps://www.conselhoimprensa.tl/tl/eventu/atividade/418-ci-undp-fo-treinamentu-komrpiensivu-ba-jornalista-radiu-komunidade

Nia mos sujere ba CI no UNDP involve mos membru PNTL sira seluk hosi rejiaun leste iha treinamentu tuir mai.

“ Tuir lolos ida ne’e jornalista hosi Baucau, Manatuto, Lautem, Viquque, no PNTL hosi Baucau deit maibe hosi Munisipiu sira seluk laiha, karik ba oin sei iha kontinuasaun treinamentu ne’e bele involve ho sira mos para sira mos bele hatene oituan no hetan koñesimentu naton ba servisu jornalista nian”, nia husu.

Liafuan agradesimentu hanesan mos hato’o hosi Jestor Radiu Komunidade Lospalos, Nascimento Provinciál, ba Conselho de Imprensa tamba bele realiza treinamentu ida ne’e no husu atu aumenta loron treinamentu hodi partisipantes sira bele kompriende didiak materia treinamentu.

“ Ami la espera kata ami radiu komunidade bele partisipa formasaun ida Kompriensivu ne’e tuir ami nia hanoin CI fo inportansia ba Jornalista Nasional maibe iha netik ba am”, nia dehan.

Treinamentu ne’e hala’o durante loron lima, ne’ebé iha primeiru sesaun apresenta hosi Treinador hosi UNDP,Tito Filipe, ho materia kona-ba utilizasaun Lian iha Produtu Jornalistika.

Iha loron daruak, Prezidente CI aprezenta kona-ba Jourrnalizmu Prespektiva Jeneru, nomós Kapasidade atu halo diferensia entre Jeneru, Identidade Jeneru, orientasaun Sexuál, Emansipasaun.

Tama ba loron da tolu, Diretur Diresaun Analiza Midia (DDAM), Alberico Junior, hato’o materia kona-ba oinsa hakerek istoria ida ne’ebe diak, nomós oinsa prepara TOR (planu kobertura) nu’udar Jornalista antes halo kobertura.

Entertantu iha loron da Hat nian, Analisis Comunication UNDP Timor-Leste, Yuichi Ishida lori materia kona-ba  Foto Jourrnalizmu, no Tekniku Diresaun Analiz Midia (DDAM) Conselho de Imprensa, Caetano Alves, hato’o materia Oinsa Jornalista halo Intervista ho diak.

Iha loron da lima nian, treinador ho partisipantes halo pratika kobertura ba problema Lixu, bee mos, merenda eskolar inklui problema infrastrutura seluk ne’ebé komunidade hasoru, tuir planu kobertura ne’ebé sira prepara. (CI )


Imprimir   Email