BAUCAU- Conselho de Imprensa de Timor-Leste (CI) ho Programa Nasoens Unidas ba Dezenvolvimentu (PNUD/UNDP), realiza Treinamentu ba Jornalista Rádiu Komunidade, Reprezentante Ofisiál Relasaun Públika hosi instituisaun relevante nomós Joventude balun.
Treinamentu ne’ebé ho tema, “Jornalizmu Kompriensivu” hodi hametin jornalista sira nia kompeténsia, realiza iha munisípiu Baucau durante semana ida, hahú hosi Segunda, 25/02 to’o 01/03/2019.
Treinamentu ne’e hetan partisipasaun hosi reprezentante Rádiu Komunidade, Lautem, Baucau, Viqueque, Manatuto, ofisiál Relasaun Publiku hosi instituisaun relevante inklui PNTL no Reprezentante Jovens balun, hamutuk ema na’in 30, feto 10 mane 20.
Iha abertura, Manajer Projetu LEARN-UNDP, Tito Filipe hatete sira sente kontente bainhira halo parseiru ho Conselho de Imprensa, atu fó kapasitasaun ba jornalista sira iha Timor laran tomak.
“Ohin loron ami kontente tamba bele habelar formasaun ne’e to’o iha Munisípiu, oinsá bele envolve rádiu komunidade sira, no korespondente mídia imprimi nomós ajente ofisiál relasaun públika,” nia dehan.
Tito dehan importante liu-liu ba LEARN Project atu bele fó apoiu ba kapasitasaun sira iha nível Rejionál. “Iha kapasitasaun ne’e importante tamba iha aspeitu barak mak ita sei aprende, hanesan jornalizmu, língua, foto, video, no étika. Ne’e kombinasaun ida ne’ebé mak importante loos bainhira ema hatene buat ne’e hotu,” nia esplika.
Ba oin, nia parte espera katak partisipante sira sériu atu apriende tamba sira mai hosi fatin dook hodi partisipante atu bele aprende hamutuk oinsá maka bele hakerek notísia ho di’ak, nomós bele halo reportazen ho di’ak, no ho étika.
“Projeitu ida ne’e ita hetan apoiu hosi povu Japaun, no formasaun ne’e la’ós halo iha ne’e de’it maibé halo mós iha sentru hanesan Maubisse atu bele kobre munisípiu sira seluk atu bele halo kapasitasaun mós iha ne’eba,” Tito hatutan.
Iha fatin hanesan, reprezentante Conselho de Imprensa, Konselleiru Jose Maria Ximenes, hatete jornalista sira presiza kapasita-án bebeik atu aprofunda liu tan kapasidade tamba iha materia balun foun maske materia balun aprende ona maibé bele aprofunda liu tan.
“Tamba ne’e liu husi Conselho de Imprensa ha’u hakarak agradese nafatin tamba ita bele realiza treinamentu ida ne’ebé nia métudu ne’e jornalizmu Komrpiénsivu, katak buka meius atu komprende saída mak ita atu halo, nune’e mós Kódigu Étika Jornalístika hosi Conselho de Imprensa nian mós tenke hare atu bele sai hanesan matadalan ba jornalista sira atu halo kobertura, ida ne’ebé mak bele halo kobertura no ida ne’ebé mak labele halo kobertura,” Konsilleiru hatete.
Nia mós dehan mundu jornalizmu ne’e tenki aprende bebeik, nune’e mos ba sira ne’ebé mídia officer sira, oinsá halo relasaun di’ak ho instituisaun sira seluk, instituisaun mídia, halo kooperasaun di’ak atu bele dezenvolve rai doben ne’e ba oin.
Nia aumenta dala barak akontese polísia ho jornalista sira kuandu iha terenu dala ruma iha problema, tamba ne’e oinsá mak halo kooperasaun di’ak ho polísia bainhira halo kobertura konjunta iha terenu.
“Husu aproveita oportunidade ida ne’e, aproveita di’ak ba, atu semana ida ne’e ita bele aprende buat barak, no ha’u espera labele baruk atu tuir to’o remata”, nia hameno