Atividade

Conselho Imprensa Komemora Loron Mundiál Rádiu ba Dala Ualu

Conselho Imprensa Komemora Loron Mundiál Rádiu ba Dala Ualu

Dili – Fulan Dezembru tinan 2011, Asembleia Jerál Nasoens Unidas sertifika loron mundiál ba rádiu iha ne’ebé nasaun membru sira Organizasaun Nasoens Unidas (ONU) nian sei halo komemorasaun.

Iha loron 14 fulan Janeiru tinan 2013, Asembleia Jerál Nasoens Unidas Ofisialmente deklara no no sertifika katak loron 13 Fevereiru nu’udár loron mundiál ba rádiu.

Timor-Leste nu’udár nasaun membru ba ONU maka Conselho de Imprensa de Timor-Leste (CI), serbisu hamutuk ho Diresaun Nasionál Sentru Rádiu Komunidade (DNCRC), UNESCO no AGH-Mitmenchen hodi komemora loron mundiál ba rádiu.

Objetivu hosi komemorasaun ne’e maka bele hasa’e konsiénsia públiku no entidade sira Estadu nian atu hatene papél meiu komunikasaun rádiu nian iha prosesu hari’i demokrasia.

Iha serimónia abertura atividade komemorasaun loron mundiál rádiu, Konselleiru José Maria Ximenes hatete ejisténsia rádiu fó influénsia tebes ba komunidade Timor nia prosesu luta ba independénsia ne’ebé hahú hosi tinan 1975 to’o 1999.

Konselleiru esplika, depois de independénsia, Ejisténsia radiu kontinua fó kontribuisaun ida maka’as tebes ba prosesu dezenvolvimentu iha Timor-Leste.

“Iha dezafiu boot tebtebes, ho dezenvolvimentu era dijitalizasaun, oinsá atu suporta rádiu sira ne’e atu ejiste nafatin, maka husu ba Governu atu bele suporta nafatin sira tanba iha era dizitalizasaun ne’e ameasa ba rádiu sira,” dehan Konselleiru Jose Ximenes.

Komemorasaun loron mundiál rádiu iha loron 13 Fevereiru 2019 iha Timor-Leste, lokaliza iha Largo Lecidere Dili ho tema “Jornalizmu Livre no Independente: Konxiénsia Étika no Polítika Redasaun”.

Iha komemorasaun ne’e, realiza mós diskusaun aberta ida, iha ne’ebé partisipa hosi Prezidente Conselho Imprensa, reprezentante Prezidente Konsellu Administrasaun

RTTL,EP, Diretór Centro Radio Comunidade (CRC), Prezidente Asosiasaun Rádiu Komunidade Timor-Leste nomos hala’o transmisaun direita hosi Rádiu Metro 94.7 mhz.

Partisipa iha Komemorasaun Loron Munidiál Rádiu maihosi Diretores Orgaun no Meiu Komunikasaun sosiál sira, Jestores Rádiu Komunidade munisípiu 12 inklui Oe-cusse, ofisiál Mídia F-FDTL no PNTL, estudante Komunikasaun Sosiál UNTL no UNITAL, reprezentante UNESCO no AGH-Mitmenchen no jornalista sira hosi orgaun no meiu komunikasaun sosiál sira iha Dili laran.