Atividade

Newsroom Importante ba Órgaun No Meiu Komunikasaun Sosiál

Newsroom Importante ba Órgaun No Meiu Komunikasaun Sosiál

DILI, Newsroom importante ba Mídia ka órgaun no meiu komunikasaun Sosiál. Informasaun ne’e hato’o hosi Diretora Interina Diresaun Komunikasaun Sosiál, Relasaun Institusional no Kooperasaun, Conselho de Imprensa de Timor-Leste (CI), Maria Bibel, hafoin fasilita Treinamento Jornalizmu Kompriensivu Faze II, ne’ebé hala’o hahú hosi 7-11/1/2019, iha salaun Konferénsia Hotel Ramelau, Dili.

“Tanba saida mak importante newsroom nee tenke iha, kuandu iha Mídia ida ka órgaun komunikasaun Sosiál ida, news room laiha, entaun koordenasaun serbisu atu fó sai informasaun ruma, akontesimentu ruma ne’e, sei la la’o ho maximu,” nia esplika.

Nia haktuir tan, lori matéria ida ne’e, atu partisipantes sira bele komprende saida mak newsroom, saida mak akontese iha newsroom, se-se mak serbisu iha newsroom. Tuir nia, kuandu iha newsroom, iha ekipa serbisu ne’ebé halo serbisu iha newsroom ho koordenasaun ne’ebé maxima, serbisu iha redasaun nian  sei la’o di’ak liu tan.

“ Tanba ne’e, Conselho de Imprensa hamutuk ho UNDP hamosu matéria ida ne’e iha Treinamentu Jornalizmu Komprensivu ba faze segundu nian,” nia realsa.

Nune’e mós, partisipante treinamentu, Eduardo Tchea, hateten durante loron lima nia laran ne’e, nia parte komprende oinsá no saida mak newsroom. “ Durante loron hirak nia laran ne’e, tuir ha’u nia komprensaun oinsá atu komprende funsaun husi newsroom ne’e ka sala redasaun ne’e.”

Tuir Eduardo, durante ne’e liu-liu ba Mídia balun seidauk komprende saida mak sala redasaun, “maibé liu husi treinamentu ne’e ami bele komprende oinsá funsaun sala redasaun ne’e, buat foun ne’ebé ami aprende liu husi treinamentu ida ne’e mak oinsá halo transkripsaun antes halo notísia, tanba durante ne’e ami rasik mak dala ruma ba halo kobertura fila mai halo notísia, ikus mai halo produsaun ba notísia ne’e.” 

Eduardo mós dehan Ida nee mós sai hanesan mata-dalan ida ba sira atu bele aplika iha sira nia organizasaun ka sira nia instituisaun rasik.

Iha fatin hanesan, partisipante, Aquita Gomes, dehan wainhira rona lia-fuan newsroom ne’e hanesan buat foun. “ Ha’u sente wainhira ha’u rona newsroom ne’e hanesan buat foun ida ba ha’u maibé kuandu ha’u aprende afinál nee la sees husi redasaun tanba ne’e liu husi aprende ne’e ha’u bele komprende saida mak newsroom ka sala redasaun ne’e.”

Aquita Gomes la taka dezafiu ne’ebé nia hasoru, “maibé ho dezafiu ida ne’e halo hau tenke buka nafatin hodi koñese no hatene kle’an liu kona-ba sala redasaun ida ne’e.”