Díli – Conselho de Imprensa de Timor-Leste (CI) liuhosi nia Diresaun Dezenvolvimentu Análize Mídia (DDAM), nota katak iha diskriminasaun kobertura hosi meius komunikasaun sosiál ba ema ho difisiente sira.
Prezidente CI, Virgílio da Silva Guterres, hato’o breve Palavra iha workshop ne’ebé organiza hosi Asosiasaun Defisiente Timor-Leste (ADTL), iha Mascarenha, ho tema “Liuhosi Mídia Ita Hasai Ema ho Defisiente hosi Ijolamentu, Diskriminasaun no Stigma Sosiál,” hodi komemora loron mundiál ba ema ho defisiente ne’ebé monu iha loron 3 fulan Dezembru.
Virgílio husu mós ba Asosiasaun Difisiente Timor-Leste (ADTL), atu bele utiliza meius komunikasaun sosiál hodi promove interese no hato’o aspirasaun sira kona-ba ema ho difisiensia sira nian.
“Ami hakarak fó ami nia apoiu tanba ami hare katak iha diskriminasaun ba kobertura ba maluk difisiente sira,” dehan Prezidente CI.
Ativista ne’e fó ezemplu katak bainhira ema ho difisiente sira ba partisipa iha Asian paragames no hetan primeiru lugar to’o bandeira dada sa’e no kanta inu nasionál Patria-Patria iha Indonézia, maibé kobertura iha Timor hanesan bainbain de’it.
Iha biban ne’e, Sekretáriu Estadu Komunikasaun Sosiál (SECOMS), Mericio Juvinal dos Reis “Akara”, kompromete atu loke rádiu komunidade ida ba Ema ho Difisiensia hodi bele promove sira nia atividade.
“SECOMS iha polítika ida, iha tinan lima nia laran ami sei hari’i estasiun rádiu komunidade tolu tan no SECOMS deside ona atu didika rádiu komunidade ida ba maluk difisiente sira,” esplika SECOMS.
Diretór ADTL, Cesário da Silva, hatete durante ne’e sira halo mós monitorizasaun ba públikasaun iha mídia sira, nota katak sei iha liafuan balun ne’ebé sei prezudika ema ho difisiénsia.
“Durante ne’e ami nota katak iha mídia balun utiliza termus balun ne’ebé maka prejudika ema ho difisiensia,” esplika Cesário.
Nia dehan papel mídia importante tebes atu hato’o lian ema ho difisiensia nian ba públiku. Cesário rekoñese katak durante ne’e mídia nia apoiu konsege lori ona ema ho difisiénsia sai hosi izolamentu. (CI)