Papel Mídia Importante Luta Kontra Korupsaun

Atividade Hare nain: 2101

Gleno – Prezidente Conselho de Imprensa de Timor-Leste (CI), Virgílio da Silva Guterres hatete, papél mídia importante tebes hodi luta kontra korupsaun iha Timor-Leste.

Prezidente CI hato’o kestaun ne’e bainhira sai nu’udar oradór ba seminariu ida ne’ebé organiza hosi Global Organization of Parliamentarians Against Corruption-Timor-Leste (GOPAC-TL), Kinta-Feira, (06/2018), iha Glenu.

Semináriu ne’e, GOPAC-TL organiza ho tema “Kombatente Luta Kontra Korupsaun maka Eroi Foun ba Nasaun Timor-Leste,” hodi komemora loron mundiál Antí-Korupsaun ne’ebé monu iha loron 9 Dezembru.

Nia dehan mídia tenke sai hanesan instrument ba kontrolu sosiál nomós halo fiskalizasaun ba funsionamentu estadu nian kona-ba despezas ne’ebé Governu ka Estadu gasta hodi hadi’a públiku nia ben estar.

“Durante ne’e kontribuisaun di’ak, bele dehan di’ak tebes iha periodu balun. Ezemplu ita hare jornal Tempo Semanal iha periodu balun sai jornál ne’ebé investigativu tebes no laran triste uituan tanba reduzidu uituan,” dehan Prezidente CI iha nia intervensaun.

Iha fatin hanesan, Laureadu Novel da Pas, José Ramos Horta, husu ba mídia sira atu hakerek notísia ida presiza halo investigasaun ida kle’an no bazeia ba faktus molok halo publikasaun.

“Ha’u husu ba mídia sira, kuandu hakerek kona-ba korupsaun, ita boot sira halo investigasaun didi’ak duni, kle’an ho faktus hotuhotu. Ita boot sira iha meius, iha esperiénsia oioin liu fali Prokuradór Jerál Repúblika,” dehan Ramos Horta.

Nia dehan jornalista sira tenke hanoin hanesan Prokuradór Jerál Repúblika, kuandu hakarak halo investigasaun ba korupsaun, estuda no hare oinsá maka sistema judisiáriu sira halo investigasaun ka oinsá polísia investigasaun kriminál halo investigasaun.

Iha fatin hanesan Diretór Jerál GOPAC-TL, João Correia, hatete Timor-Leste restaura nia independensia durante tinan 17 ona iha ne’ebé antes ne’e ultrapasa terus no mate, tanba ne’e ohin loron ita konvida malu ba kombate foun ida naran virus korupsaun.

“Ita agora konvida malu ba kombate foun ida ne’ebé la utiliza armas hasoru inimigu foun ida naran korupsaun. Kombate ida ne’e la’ós de’it halo iha Timor-Leste maibé halo mós iha países barak iha planeta ida ne’e,” esklarese Joao Correira. (CI)