CI No UNDP Oferese Matéria Mídia Sosiál No Jornalizmu, Dezeñu Jornál, Iha Treinamentu Jornalizmu Kompriensivu

Atividade Hare nain: 2631

Dili, Conselho de Imprensa de Timor-Leste (CI) no UNDP Timor-Leste, iha loron 29-30/11, lori Jornalista Internasionál hosi  Australia, Bob Howarth, Korrespondente Nasaun Timor-Leste, Papua Nova Guinea, Illa Salomon ba Reporters San Frontiers (Paris), hodi fasilita Treinamentu Jornalizmu Kompriensivu Faze II ho matéria kona-ba mídia sosiál no jornalizmu iha loron da uluk no dezeñu jornál iha loron da ruak.

Wainhira lori matéria kona-ba mídia sosiál no jornalizmu, Bob foka nia aprezentasaun ba vantajen no dezvantajen hosi sosiál mídia sira hanesan Facebook, whatsAap, no seluk tan. Alein ne’e, Bob, esplika kona-ba oinsá bele sees hosi hacker, oinsá proteje dokumentu no photo atu ema seluk labele copy no lee.

Bob, mós fó ezersísiu ba partisipantes sira atu buka informasaun kona-ba data estatístika nasaun ne’ebé uza Facebook barak liu.

Bob fó nia sujestaun ba mídia online sira iha Timor-Leste katak, atu bele tau informasaun públiku no Emerjensia nian iha pájina públiku mídia sosiál iha ida-idak nia pájina mídia sosiál. 

Iha oportunidade ne’e, esbosu mata-dalan mídia sosiál ba jornalista no meius komunikasaun sosiál, aprezenta hosi Diretór Dezenvolvimentu no Analiza Mídia, Conselho de Imprensa, Alberico da Costa Junior. Esbosu mata-dalan mídia sosiál ba jornalista no meius komunikasaun sosiál ne’e rasik hamosu hosi Conselho de Imprensa servisu hamutuk ho UNESCO.

Iha loron da rua, Bob foka kle’an kona-ba dezeñu jornál ba partisipantes sira ho fó ezemplu sira ne’ebé mai hosi nasaun liur atu oinsá bele atrai lee nain sira.

Bob halo pratika dezeñu jornál no ID Card ho simples uza Microsoft Publisher.

“Benefísiu mai ami partisipantes hotu fo ona hanoin mai ami partisipantes sira liuliu kon-ba mídia sosiál ninian liuliu kona-ba password, ID falsu, uluk ami la hatene, kona-ba password ema labele hatene ita nia code,” esplika Julia Perreira, nu’udar partisipantes treinamentu hosi Radio Komunidade Komoro.

Nune’e mós ho, Dominggus Soares, partisipantes treinamentu hosi Fakuldade Komunikasaun Sosiál UNTL hatete katak, nia kontente partisipa iha treinamentu ne’e tanba iha benefísiu barak, “oinsá uza mídia sosiál, ida ne’ebé mak ita bele uza no ida ne’ebe mak ita labele uza, oinsá ita bele save ka proteje akun sira, oinsá hatene ID falsu ne’ebe bele influensia ita nia ID rasik, ohin aprende kona-ba dezeñu jornál, oinsá ema bele komprende no entende no bele dada ema, “ esplika Dominggus Soares.