CI Partisipa iha V Kongresu Internasionál Komunikasaun, Jornalizmu no Espasu Públiku

Portugal, Prezidente Conselho de Imprensa, Virgílio da Silva Guterres, partisipa iha “V Congresso Internacional de Comunicação, Jornalismo e Espaço Público” ne’ebé hala’o durante loron rua (13-14/11), iha Universidade Coimbra, Portugal.

Eventu ne’ebé organiza hosi Centro de Estudos Interdisciplinares do Século XX, CEIS 20, Universidade Coimbra kompostu hosi sesaun plenária no sesaun paralela ho diskusaun kona-ba asuntu ne’ebé relasiona ho Étika no Deontolojia Jornalízmu iha Espasu Luzófonu.

Tópiku sira ne’ebé sai matéria diskusaun iha fórum ne’e mak hanesan,Dezafiu no pratika profisaun, etika no deontolojika Jurnalizmu, regulamentu informasaun no responsabilidade jornalista.

Oradór importante sira iha kongresu ne’e mak Professór Diogo Aurélio hosi Universidade Nova Lisboa, Professor Hugo Aznar hosi Universidade CEU Cardenal Herrera, Valencia (Espanha), Professór Carlos Camponez hosi FLUC no akadémiku seluk hosi país lusofonia hanesan Brazil, São Tomé e Príncipe, Cabo Verde no Mocambique.

Prezidente Conselho hola parte iha sesaun plenária II loron 13 Novembru lokraik ho intervensaun kona-ba Kodigu Etika, regulamentu no komitmentu profisinal.

Iha nia intervensaun, Virgílio da Silva Guterres, fahe esperiénsia no prosesu adopsaun kode étika jornalístika iha Timor ne’ebé hahú kedas iha tinan 1999 liu hosi estabelesimentu Asosiasaun Jornalista Timor Lorosa’e, AJTL, iha Hotel Turismo, kongresu nasionál jornalista Timor-Leste iha tinan 2013, no aprovasaun Kode Étika Jornalístika iha tinan 2016, hosi Conselho de Imprensa de Timor-Leste.

Prezidente CI mós deskreve kona-ba ezisténsia Conselho de Imprensa nu’udar mekanizmu ki-regulasaun ba komunikasaun sosiál ho nia papél supervizór, mediadór no fiskalizadór. Partisipa iha kongresu ne’e estudante timoroan na’in 3 ne’ebé estuda iha área Jornalismo e Comunicação e Faculdade de Letras Universidade Coimbra.

Estudante sira ne’e mak Clara Salomea (Covalima), Júlio Afonso (Liquiça) no Agostinho Alves (Manatuto). Estudante sira ne’e hahú sira nia estudo iha Universidade Coimbra iha tinan akadémiku 2014-2015.

Eventu internasional ne’e remata iha loron 14 Novembru ho asinatura akordu kooperasaun entre instituisaun akadémika, sentru formasaun profisionál no orgaun reguladór komunikasaun sosiál hosi nasaun luzofonia nian atu hari Rede Lusófona pela Qualidade de Informação (Rede Luzofona ba Kualidade Informasaun) RLQI.

Asinante akordu kooperasaun ne’e hamutuk 16, inklui Universidade Coimbra, Instituto Superior de Ciências Sociais e Políticas, ISCSP, Universidade de Lisboa, University of Saint Joseph, Macau, Sindicato Jornalistas Portugal, ERC Portugal, Conselho de Imprensa Timor-Leste, Universidade Cabo-Verde, Universidade Lusófona Guiné, Comissão da Carteira Profissional de Jornalistas de Portugal, Universidade Federal de Santa Catarina, UFSC, Brazil, Rede Nacional dos Observatório da Imprensa, Brazil, no seluk tan. Serimonia asinatura akordu hala’o iha salaun Reitoria Universidade Coimbra ho prezensa Reitór Universidade Coimbra, Eng. João Gabriel Silva.

Ho asina akordu kooperasaun ne’e, Conselho de Imprensa sai ona membru ba plataforma boot 2 komunikasaun sosial nian. Iha 2016, iha Bissau, kapital Guiné-Bissau, Conselho de Imprensa sai membru ba Plataforma das Entidades Reguladoras, PER, para Comunicação Social dos Países e Territórios de Língua Portuguesa. Agora, 2018, sai tan membru ba Rede Lusófona pela Qualidade de Informação (RLQ).


Imprimir   Email