Data Journalizmu Importante Ba Jornalista

Díli, Partisipantes treinamentu jornalizmu komprensivu ba fase daruak, aprende kona-ba “Data Jornalizmu”, durante loron tolu, hahu kuarta too sesta-feira ne’e (24-26/10) ne’ebé fasilita hosi Communication Officer UNDP Timor-Leste, Yuichi Ishida, iha laboratóriu Institutu Canossa.

Yuichi Ishida, informa katak treinamentu ne’e atu partisipantes sira aprende kona-ba oinsa uza dadus wainhira hakerek notisia, “ohin halo treinamentu kona-ba data journalizmu atu jornalista sira aprende uza dadus tanba dadus hanesan evidénsia,” esplika Yuichi.

Communication Officer UNDP Timor-Leste ne’é, hatutan tan katak iha treinamentu ne’e partisipantes sira bele komprende kona-ba halo koreksaun dadus, visualiza nomós oinsa transforma dadus ba narrativa.

“Matéria ohin hau sente importante tebes tanba ita nu’udar jornalista presiza faktu, faktu mak presiza ita nia dadus, depois ita presiza mó ita tenke tau ho ninia gráfiku ruma, atu nune’e públiku bele hatene saida mak jornalista nia kobertura ba,” dehan Partisipantes Treinamentu, Anibal do Espiritu Santo, Estudante Komunikasaun Sosiál  UNITAL.

Nune’e mós ho Teresa Xavier, Estudante Komunikasaun Sosiál  UNITAL haktui katak materia ne’e importante ba estudante komunikasaun sira“ba estudante importante tanba hare ba dadus bainhira tun ba halo kobertura.” Deklara Teresa Xavier.

Treinamentu ne’e organiza hosi Conselho de Imprensa de Timor-Leste (CI) no Programa Nasoens Unidas ba Dezenvolvimentu (UNDP). 


Imprimir   Email