DILI, 04/10_Prezidente CI ho nia membru hamutuk ho strutura ezekutiva Conselho de Imprensa de Timor Leste (CI) halo audiensia ho Deputada Parlamentu Europeia, Dra. Ana Gomes, ho intensaun atu hare besik saida mak durante ne’e Conselho de Imprensa halo.
Audensia durante oras balun nia laran ne’e halao iha sala eskritóriu Prezidente Conselho de Imprensa nian.
Hafoin Audensia ne’e, Prezidente CI, Virgílio da Silva Guterres informa, mesmu Doutora Ana Gomes sai ona Membru Parlamentu Europeia nian maibe nia nafatin fo nia atensaun ba Timor, liuliu ko’alia nu’udar politikus no amigo Timor nian.
“Buat ida ami konkorda hamutuk maka Conselho de Imprensa nia preokupasaun mak fo formasaun ba Jornalista sira, i nia rasik apoiu tebes no husu Conselho de Imprensa atu halo aprosimasaun ho Uniaun Europeia iha Timor Leste, no mós organizasaun sira ho kapasidade formasaun iha Portugal atu bele apoiu”, Prezidente dehan.
Tuir responsavel maximu CI ne’e, Dra Ana iha nia promesa ba Conselho de Imprensa atu bele esforsu hotu hodi bele enkoraja organizasaun sira ne’ebé ke nia hatene atu bele fo apoiu ba Conselho de Imprensa, nune’e halo formasaun iha Timor-Leste.
“ Liu liu nia preokupa tanba daudaun ne’e nia iha Europeia ne’ebá mós nia lidera hela ekipa parlamentu nian hodi halo investigasaun asasinadu Jornalista Malta ninian”, nia aumenta.
Tamba ne’e nia sente perigu hasoru meius Komunikasaun sosiál, impojisaun podér polítiku, poder ekonómiku ne’e la’o la’ós iha Timor de’it maibé iha fatin hotu-hotu la’o, tan ne’e kapasidade Jornalista sira ne’e importante nune’e Dra Ana Gomes sei hakas atu apoia.
“ Tanba ne’e ami hamutuk ho diskute oinsa ikus mai bele dezenvolve projetu ruma ho sira liu liu iha area kapasitasaun ba jornalista nian,” nia dehan.
Nune’e mós, Dra. Ana Gomes iha nia entrevista hakarak apoiu Conselho de imprensa tamba Uniaun Europeia sei apoiu makas ba kapasitasaun jornalista sira iha Timor Leste.
Nia mós dehan papél Conselho de Imprensa ba kapasitasaun jornalista sira ne’e importante tebes liu-liu ba hare kazu konkretu ruma.
“porezemplu daudaun iha ne’e, kazu Konselleiru Francisco Belo nian, ne’ebé Órgaun Komunikasaun Sosiál GMN halo ba nia”, hateten Dra. Ana Gomes.