Dili, 12/10/2018 – Diretór Analisa no Desenvolvimentu Mídia (DDAM), Alberico da Costa Junior, hatete importansia kódigu étika jornalístika mak sai hanesan mata dalan morál ida ba jornalista sira.
“Importánsia mak ne’e, sai hanesan mata dalan morál ida ba jornalista sira para atu la’o tuir nune’e bele evita jornalista sira sai hosi risku legál,” esplika Alberico da Costa Junior, wainhira hato’o materia kona-ba kódigu étika jornalístika ba partisipantes treinamentu journalismu komprensivu, iha sala konferénsia Ótel Ramelau, Sesta (12/10).
Diretor DDAM ne’e subliña katak, iha treinamentu ne’e partisipantes sira husu kona-ba oinsa jornalista sira la halo sala iha servisu redaksaun, “sira husu buat barak iha relasaun ho lia fuan sira ita uza liuliu iha prosesu redasaun ninian, proses pengeditan sira ne’e oinsá, lia fuan sira ita tau viola kódigu étika ka lae, dala ruma fonte ida de’it padahal asuntu ne’e kontroversi,” esplika Alberico da Costa Junior.
Diretór fiar katak partisipantes sira bele kompriende no implementa koñesimentu ne’ebé sira simu, “ita nia esperansa mak ne’e, wainhira sira hatene, importante sira la’o tuir, halo tuir ne’e mak dala ruma difisil, dala ruma iha fatór balu, fatór redasaun ninian, maibé hau hanoin koko para tenke kumpri duni,” hatete Diretór DDAM.
Partisipantes, Dominggus Soares, hosi Departementu Komunikasaun Sosial UNTL, hatete kódigu étika ne’e importante ba jornalista sira atu labele kontra, “kódigu étika ne’e importante, se liga ba relijiaun, ukun fuan karik, hanesan regula ema lalika kontra,” haktuir Dominggus Soares.
Nune’e mós partisipantes hosi Radio Komunidade Komoro, Dili, Sidonia Fernandes, esplika katak nia komprende kona-ba étika journalizmu,”hau komprende liu kona-ba étika jornalizmu ninian, oinsá jornalista ida uza étika ne’ebé di’ak,” informa partisipantes ne’e kona-ba saida mak nia aprende iha loron dala neen hosi treinamentu jornalizmu komprensivu ba faze daruak ne’e. (CI)