Dili, 12/10/2018 - Membru Conselho de Imprensa de Timor-Leste (CI), Konselleiru, José Maria Ximenes, aprezenta matéria “Oinsá dezenvolve istória sai notísia”, iha salaun konferénsia Ótel Ramelau, Kinta (11/10).
“Oinsá dezenvolve istória sai notísia, ita presiza hatene saida mak notísia, e saida mak jornalista ne’e, oinsá halo notísia, estrutura notísia oinsá maka di’ak.”Esplika Konselleiru, José Maria Ximenes.
Iha treinamentu ne’e, Konselleiru José Maria Ximenes, esplika mós kona-ba oinsa diferensia hakerek notisia iha Radio, Televizaun no iha Jornál, “Sira hakarak aprende, tanba sira halo komparasaun saida mak sira aprende iha sira nia universidade, porezemplu ohin ko’alia kona-ba lead, lead ba radio televizaun la hanesan ho jornál,” informa Konselleiru, José, hodi hatan ba perguntas husi partisipantes sira.
Sabina Klau, nu’udar partisipantes treinamentu hosi Jornál Timoroman haktuir katak, iha treinamentu ne’e nia apriende kona-ba oinsa foti informasaun no hakerek notísia, “esplikasaun ohin loke hau nia hanoin oinsá hakerek notísia no oinsá foti informasaun hosi fontes pois fila fali mai hakerek notísia fó sai ba públiku,”haktuir Sabina Klau.
Reinato de Oliveira, hosi Radio Komunidade Loriku Lian, hato’o mós koñesimentu ne’ebé nia hetan iha formasaun ne’e, “ohin loron hau bele hatene, ne’e mak oinsá ita bele hatene istória ida no mós oinsá ita atu bele dezenvolve,” hatete Reinato de Oliveira.