Atividade

Diretora Ezekutiva CI : Xave Profisaun Jornalista Maka Kódigu Étika Jornalístika

Dili, Conselho de Imprensa de Timor-Leste (CI), realiza kolókiu públiku loron sorin kona-ba kódigu étika jornalístika, iha salaun Pusat Budaya Indonesia, andár segundu, iha loron 25/9/2018.

Atividade ne’e foka ba asuntu Étika Jornalístika nu’udar xave protesaun ba profisaun jornalizmu no oinsá asegura servisu jornalizmu.

“Xave ida ba ita hotu ne’ebé mak hakarak hahú ita nia profisaun iha jornalista, ida ne’e maka kódigu étika,” dehan Diretora Ezekutiva Conselho de Imprensa de Timor-Leste (CI), Ana Teresa Sequeira, hodi hahú nia diskursu iha kolókiu públiku ne’e.

Tuir nia, étika mak asegura jornalista labele halo mal pratika, “étika importante tanba saida, tanba ita presiza iha protesaun ba iha ita nia profesi atu bele asegura ita labele halo mal pratika iha ita nia profisaun, atu asegura mós ita atu labele halo abuju ba ita nia profisaun.”

Dominika Dwi Kory Sitaresmi, Xefe Departamentu Komunikasaun Sosiál, UNTL, iha nia intervensaun agradese ba Conselho Imprensa tanba sempre fo hanoin kona-ba kualidade jornalístika no kandidatu jornalista iha Timor-Leste.

Xefe Departamentu ne’e mós informa katak, UNTL iha mós matéria espesífiku ba étika deontologyka jornalístika.

Iha breve Palavra, Xefe Departamentu Komunikasaun Sosiál, INITAL, Martinho Mendes, ko’alia mós katak iha UNITAL eziste mós matéria étika deontologyka jornalístika. Nia mos husu  estudante sira tenke aproveita oportunidade kolokiu ne’e hodi kontribui ba koñesimentu ba futuru tanba iha futuru sei hasoru difikulidade barak.

Xefe Atase Budaya Dan Pendidikan (KBRI), iha Pusat Budaya Indonesia. ko’alia liu oinsá bele halo servisu hamutuk no kolokiu ne’e nu’udar atividade importante tanba jornalista kaer xave dezenvolvimentu. Nia mos esplika kona-ba programa bolsa de estudo ne’ebé ofrese husi embaxada Indonesia iha Timor-Leste ba timor oan sira.

Iha sesaun aprezentasaun alein lori senior jornalista sira, iha mós aprezentasaun espesífiku kona-ba Kódigu Étika Jornalístika, ne’ebé fasilita hosi membru CI, Konselleiru, Hugo Fernandes.

Hugo Fernandes. esplika kle’an kona ba kódigu étika jornalístika inklui prinsípiu jornalizmu nian hanesan, informa lia los, serbí sidadaun, independénsia iha halo verifikasaun no autoridade morál atu kontrolu podér.

Partisipantes sira partisipa ativu hosi hato’o sira nia duvida kona-ba prinsípiu jornalizmu no kona-ba opiniaun públiku liga ona ho prinsípiu jornalista ne’ebé publika iha mídia eletróniku hanesan TV no Radio.

Hatan ba ne’e Konselleiru CI ne’e hatete, jornalista sira tenki iha autoridade morál, “saida maka lori jornalista atu iha autoridade morál, fila fali ba ida-idak nia konxiénsia, tetu di’ak, sala, los, ladi’ak, kestaun ida, maibé dala ruma mós moral ne’e atitude, interaksaun pesoál iha família, komunidade, ne’e mak forma ema nia karater, ida ne’e mós maka forma jornalista nia interaksaun, esplika Hugo Fernandes. (CI)