Dili, Conselho de Imprensa de Timor-Leste (CI) no UNDP Timor-Leste, lansa Treinamentu Jornalizmu Kompriensivu ba Períodu II, iha salaun Konferénsia Ótél Ramelau, Sesta (28/09/2018).
Iha diskursu, Tékniku Advisor UNDP, Andres del Castillo, informa katak UNDP orgullu kontinua apoiu treinamentu ne’e, “ami hosi UNDP kontente tebetebes bele apoia grupu dala rua komesa formasaun jornalizmu, ami gosta programa ne’e tanba programa la’ós teoriku de’it, maibé pratika, esplika Andres del Castillo.
Tékniku Advisor UNDP, ne’e mós informa katak uniku hosi treinamentu ne’e mak pratika barak no iha mós matéria espesiál, “iha treinamentu espesiál kona-ba area espesiál, hanesan jéneru, ekonomia no seluk tan,”
Tékniku Advisor UNDP ne’e mós apresia parseria entre UNDP ho Conselho de Imprensa no apresia mos ba susesu ne’ebé atinje hamutuk ona, agradese mos ba povu no governu Japaun ne’ebe suporta ona UNDP no CI hodi realiza programa ne’e.
Prezidente Conselho de Imprensa de Timor-Leste (CI), Virgílio da Silva Guterres, iha nia diskursu hato’o mos CI nia orugullu ba kontinuasaun apoiu ne’ebe mai hosi UNDP no Governu e povu Japaun, “apoiu ne’e importante ba Conselho Imprensa tanba saida, tanba durante periodu ita hasoru empasse polítika, Conselho Imprensa kontinua halo atividade.” Esplika Prezidente CI.
Programa jornalizmu komprensivu, ba períodu I, lansa iha Salaun Maubara, Timor Plaza, Dili, iha loron 18/1/2018, ne’ebé remata iha fulan Jullu tinan ne’e.