Enkontru Ho Xefe Governu, CI Relata Pontu Prinsipál Tolu.

Dili, Membru Conselho de Imprensa de Timor-Leste(CI), kompostu hosi Prezidente CI, Virgilio da Silva Guterres, Membru I no Ezekutiva CI, hala’o enkontru ho Primeiru Ministru, Taur Matan Ruak, Iha Pallasu Governu, Kinta, 20/9/2018.

Prezidente CI, esplika objetivu sorumutu katak, “primeiru, atu kongratula Primeiru Ministru tanba hetan fiar atu sai xefe Governu daualu, segundu, atu informa ba Xefe Governu kona-ba atividade no programa hotu ne’ebé Conselho Imprensa halo no terseiru, hato’o preokupasaun sira ne’ebé Conselho Imprensa iha.”  

Prezidente CI, hatutantan katak programa barak mak CI plane maibé la bele realiza iha tinan ne’e tamba impaktu impasse polítika, “Conselho Imprensa mos buka komunika ho Primeiru Ministru kona-ba planu orsamentu Conselho de Imprensa ninian ba atividade sira ne’ebé instituisaun ne’e propoin ona ba tinan ida ne’e maibé Conselho de Imprensa la realiza tanba empase polítika ne’ebe ita hasoru.” Esplika Virgílio da Silva Guterres.

“Conselho Imprensa mós husu atu Primeiru-Ministru enkoraja membru Guvernu sira atu uza sira nia direitu de resposta bainhira iha mídia nia komunikasaun laloos tuir sira nia deklarasaun, entaun sira labele nonook, sira tenke hato’o, ne’e hanesan meius ida atu kontribui mos ba hadia kobertura ne’ebé kualidade hosi Mídia sira,” subliña Prezidente CI.

Prezidenti CI informa mos sujestaun sira ne’ebe Primeiru Ministru fo, katak, “kona-ba kuadru legal sira ne’e, Primeiru Ministru nia sujestaun Conselho Imprensa iha kontaktu ho Ministériu asuntu Reforma Legislativa ho Parlamentar no SECOMS, atu hare hamutuk oinsá bele hamosu esbosu ba kuadru legal ka lei radio no televizaun, dekretu Governu ba atribuisaun karteira profisionál. 

Relasiona ho kondisaun edefisiu Conelho de imprensa, Primeiru-Ministru husi CI esforsu aguenta tanba instituisaun inklui Ministériu barak mós seidauk hetan espasu atu halo servisu, ba asuntu mídia ninian Xefe Governu husu ba jornal, radio no televizaun tenki iha kreatividade no labele tarde ofrese informasaun hodi bele kompete ho mídia modernu (facebook, youtube no Twitter no seluk tan).


Imprimir   Email