CI Audénsia ho SECOMS, Deiskuti Asuntu Tolu Importante

Díli – Conselho de Imprensa de Timor-Leste (CI), foin lalais ne’e hala’o audénsia ho Sekretáriu Estadu Komunikasaun Sosiál (SECOMS) hodi diskuti kona-ba asuntus tolu (3) importante ne’ebé involve instituisaun rua refere.

Audénsia ne’ebé realiza iha salaun enkontru SECOMS, Palásiu Governu, involve Prezidente CI, Membru sira nomós Diretora Ezekutiva CI ho nia estrutura, parte SECOMS nian hola parte hosi Sekretáriu Estadu rasik, Diretór Nasionál Diseminasaun Informasaun (DNDI) nomós asesor sira.


Alien de diskuti asuntus importante sira, iha audénsia dahuluk entre CI ho SECOMS ne’e mós nu’udar parte ida oinsá maka CI bele hato’o jestu de kortezia ba Sekretáriu Estadu foun iha ointavu Governu Konstitusionál.


Asuntu tolu (3) importante ne’ebé diskuti hamutuk entre CI ho SECOMS iha audénsia refere maka hanesan, primeiru, diskuti kona-ba futuru serbisu hamutuk CI ho SECOMS kona-ba estabelesementu Institutu Jornalizmu no ezame karteira profesionál, Segundu, CI husu atu Governu bele produz lei rádiudivuzaun, terseiru, CI husu atu Governu liuhosi SECOMS bele fasilita fatin provizoriu ida ba CI atu hala’o serbisu tanba edifísiu atuál nia kondisaun ladun favoravel ona.


“Asuntu sira ne’ebé ninia ezekusaun tenke sura ho kontibuisaun ka apoiu SECOMS nian hanesan planu atu estabelese institutu formasaun jornalizmu ninian, ezekusaun kona-ba ezame ba jornalista sira liuliu ba atribuisaun karteira professional ninian.”


“Ami mai hato’o mós preokupasaun balun kona-ba edifísiu Conselho de Imprensa ninian ne’ebé ami hato’o ona atu sekretáriu estadu komunikasaun sosiál hodi buka mós edifísiu provizóriu ida ba CI,” Hatete Prezidente CI.


Iha okaziaun ne’e, Prezidente CI informa mós ba Sekretáriu Estadu Komunikasaun Sosiál kona-ba kondisaun mídia sira nian iha ne’ebé hetan ameasa tebes tanba impaktu hosi impáse polítika ne’ebé ladauk ramata. (CI)


Imprimir   Email