Díli – Komisaun Funsaun Públiku (KFP), Sesta-Feira, 13/09, iha salaun Enkontru Minitériu Obras Públika (MOP), Cai-coli Díli, hala’o sosializasaun kona-ba Direitus no Deveres sira Funsionáriu no Ajente Administrasaun Públika nian ba staff ezekutiva Conselho de Imprensa de Timor-Leste (CI).
Iha sosializasaun ne’e, mosu mós kestaun balun ne’ebé levanta hosi funsionáriu CI nian katak sira nia kontratu durante tinan rua uja termu sertu maibé aplika fali tabela salariál funsaun públiku nian.
“Ami nia kontratu termu sertu, maibé aplikasaun salariál ne’e grau um (1) fali, tabela saláriu funsaun públiku ninian. Tuir loloos parte legál hosi KFP iha ne’e karik bele esplika ba ami para komprende, lamenta Caetano Alves.
Sekretária Ezekutiva, Komisaun Funsaun Públika (KFP), Maria de Jesus Sarmento hatete kuandu CI seidauk iha tabela salariál rasik maka sei uja nafatin tabela salariál komisaun funsaun públika nian.
“Bainhira ita boot sira seidauk iha tabela salariál ne’ebé maka legál hakarak ka lakohi tenke uja tabela funsaun públika,” esplika Sekretária Ezekutiva KFP, Maria de Jesus Sarmento, hatan ba kestaun ne’ebé levanta hosi funsionáriu CI nian.
Maria dehan non level ne’e uja liu ba kazuais sira. Nia esplika funsionáriu CI tama ona iha ajénte administrativu maka sei selu ho orsamentu iha item ida saláriu no vensimentu.
Nia dehan tanba ajente administrasaun públika ne’ebé selu salariu liuhosi payroll ne’e kesi ho estatutu funsaun públika iha artigu númeru 3.
Sekretária Ezekutiva dehan kontratu termu sertu ne’e tanba ita halo kontratu ba ema nia profesionálizmu, ema nia matenek hodi mai fó apoiu ho periodu ne’ebé presiza.
Parte seluk hato’o perguntas kona-ba funsionario Conselho de Imprensa de Timor-Leste (CI), kontinua hala’o serbisu hanesan loron bain-bain maske konsellu ministru hatun despaixu (pontu toleransia) katak funsionáriu publiku no ajente administrative estadu sira deskansa iha loron boot sira.
“Dalaruma iha desizaun ruma ka ami hetan ona karta ruma hosi Konsellu Ministru iha ne’ebá dehan pontu de toleransia ne’e loron tomak maibé dalaruma ami tenke serbisu loron sorin, ne’e oinsá? Desizaun ne’e kontra desizaun hosi Konsellu Ministru ne’e soke ka lae?,” lamenta Diretór DDAM.
Sekretária Ezekutiva, Komisaun Funsaun Públika (KFP), Maria de Jesus Sarmento hatete kuandu iha pontu de toleransia ne’e depende ba komunikadu hosi governu tanba governu
“Komunikadu iha ne’eba ne’e dehan halo nusa, loron tomak ka lae. Sé nia la dehan loron tomak, depende ba superior instituisaun.”
“Kuandu iha loron boot ruma kona-ba santo nian, entaun ita ba misa tiha maka mai fali halo serbisu. Uluk liu iha kuarta feira sinjas, ha’u nia esperiensia, kuandu ami sai hosi igreja, Primeiru Ministru ba hein tiha ona iha ami nia serbisu fatin,” esplika Sekretária Ezekutiva Maria de Jesus Sarmento.