Díli – Conselho de Imprensa de Timor-Leste (CI) hanesan instituisaun estadu ne’ebé independente, iha ninian serbisu administrasaun kona-ba avaliasaun dezempeñu pesoál, CI uja formatu ne’ebé Komisaun Funsaun Pubiku produz.
Bazeia ba kontratu funsionáriu CI nian ne’ebé kada tinan halo renovasaun tanba ne’e avaliasaun dezempeñu nia implikasaun ba funsionamentu funsionáriu CI nian laiha signifikadu.
“Ami nia estatutu la permite atu ba funsionáriu públiku, ami ajente administrasaun. Oinsá ami nia avaliasaun dezempeñamentu? Ami kontratu tinan ida ramata, agora halo avaliasaun dezempeñu atu halo saída? Avaliasaun nia rezultadu ne’e saída,” hatete funsionáriu CI, Caetano Alves, iha atividade diseminasaun informasaun kona-ba direitus no deveres sira funsionáriu no ajente administrasaun públiku, hosi Komisaun Funsaun Públiku (KFP), iha salaun enkontru Ministériu Obras Públika (MOP), Cai-coli, Díli.
Iha fatin hanesan, Diretór Diresaun Dezenvlvimentu Análiza Mídia (DDAM), Alberico Junior, lavanta mós kestaun kona-ba avaliasaun dezempeñu ninia métodu rasik.
“Liga ho avaliasaun dezempeñu, ha’u hakarak husu kona-ba métodu oinsá ita atu halo penilaian (Avaliasaun)? Ita ema dalaruma mosu penilaian subiektivitas makas liu entaun penilaian ne’e dalaruma ses uituan,” dehan Diretór Alberico lamenta mós katak avaliasaun ne’e bazeia de’it ba kritériu ne’ebé iha ona kah bele bazeia ba Nurani.
Sekretária Ezekutiva, Komisaun Funsaun Públika (KFP), Maria de Jesus Sarmento hatete avaliasaun dezempeñu nia efetu ba kontratu sira maka liuhosi avaliasaun dezempeñu bele deside atu estende ka lae kontratu funsionáriu ida nian.
“Sé lae labele estende, ne’e efeitu ida ba kontratadu sira maka ne’e. kuandu ita boot sira nia avaliasaun la di’ak hapara ita boot sira nia kontratu.”
“Ne’ebé la’ós katak ita boot la’ós funsionáriu públiku be lapresiza avaliasaun dezempeñu. Presiza avaliasaun dezempeñu,” dehan Sekretária Ezekutiva, Komisaun Funsaun Públika (KFP), Maria de Jesus Sarmento.
Nia hatutan kuandu avaliasaun dezempeñu di’ak, serbisu di’ak, maka sei halo promosaun ba funsionáriu, ita bele ko’alia ho patraun bele hasa’e saláriu.
KFP ne’e esplika kuandu superior ida fó konsiderasaun ka valoriza funsionáriu ida nia serbisu ne’e signifika katak halo duni tratamentu justu ba ema hotu-hotu.